گوگل نیوز پر ہمیں فالو کریںکراچی میں گاڑی سے خوفناک تصادم میں باپ بیٹی جاں بحق ہوگئے، سابق اپوزیشن لیڈر سندھ اسمبلی حلیم عادل شیخ نے کارساز حادثے کو قتل قرار دیتے ہوئے واقعے کی سی سی ٹی وی فوٹیج شیئر کردی۔
سماجی رابطے کی ویب سائٹ ایکس (ٹوئٹر) پر اپنے پیغام میں سابق قائدِ حزبِ اختلاف سندھ اسمبلی حلیم عادل شیخ نے کہا کہ سی سی ٹی وی ویڈیو کے بعد واضح ہوگیا ہے کہ یہ حادثہ نہیں، قتل ہے۔
ایکس پیغام میں حلیم عادل شیخ نے کہا کہ اس ملک کا دوہرا نظام اب اس امیر زادی خاتون کو ذہنی مریض ثابت کرنے کی کوشش کرے گا، ان معصوم باپ بیٹی کے خون کو ضائع نہیں ہونے دیں گے۔
اس CC tv وڈیو کے بعد واضع ہوگیا ہے کہ یہ حادثہ نہیں قتل ہے ۔
اس ُملک کا دوہرا نظام اب اس امیرزادی خاتون کو زہنی مریض ثابت کرنے کی کوشش کریگا ۔
ان معصوم باپ بیٹی کے خون کو ضایع نہیں ہونے دینگے قاتل کو انجام تک پُنہچنا ہوگا ۔ pic.twitter.com/rgaoY16ZQ8
— Haleem Adil Sheikh (@HaleemAdil) August 20, 2024
خیال رہے کہ واقعے کی سی سی ٹی وی فوٹیج سوشل میڈیا پر گزشتہ 48 گھنٹوں سے وائرل ہے جس میں دیکھا جاسکتا ہے کہ خاتون کی گاڑی عمر رسیدہ باپ اور جواں سال بیٹی کو موٹر سائیکل پر جاتے ہوئے عقب سے آٹکراتی ہے۔ حلیم عادل شیخ کا کہنا ہے کہ قاتل کو انجام تک پہنچنا ہوگا۔
کارساز پر حادثہ ہوا یا قتل؟
واقعے کی سی سی ٹی وی فوٹیج دیکھ کر تکنیکی اعتبار سے کچھ بھی ثابت نہیں کیاجاسکتا کہ یہ واقعہ حادثے کا نتیجہ ہے یا جان بوجھ کر موٹر سائیکل کو روندا گیا، تاہم گاڑی باپ اور بیٹی کے جاں بحق ہوجانے کے بعد بھی بے قابو ہی رہی اور دیگر افراد کو بھی زخمی کردیا تھا۔
واقعے پر ایک جانب تو سندھ پولیس تحقیقات کر رہی ہے۔ واقعے کا مقدمہ بہادر آباد تھانے میں درج کیا گیا ہے۔ ایس ایچ او بہادر آباد نے کہا کہ ابتدائی تحقیقات کے مطابق خاتون نے نشہ نہیں کیا تھا۔ عدالت میں وکیل نے دلائل دئیے کہ خاتون ذہنی مریضہ ہے، عدالت نے 1 روزہ ریمانڈ منظور کیا تھا۔
