حکومت نے الیکشن کمیشن کے ارکان سے سیکورٹی واپس لے لی

اسلام آباد :حکومت نے الیکشن کمیشن آف پاکستان کے ارکان کو دی گئی سیکورٹی واپس لے لی ،الیکشن کمیشن نے فیصلے پر تشویش کااظہار کیا ہے۔

ذرائع کے مطابق وفاقی حکومت نے سندھ اور پنجاب کے ارکان کو دی گئی سیکورٹی واپس لے لی ہے جبکہ اسلام آباد پولیس کے اہلکاروں کو بھی الیکشن کمیشن کے ارکان کی سیکورٹی ڈیوٹی سے واپس بلایا گیاہے۔

ای سی پی کے ذرائع کے مطابق وزارت داخلہ کی ہدایات پر ارکان سے سیکورٹی واپس لے لی گئی۔ذرائع نے مزید بتایا کہ ای سی پی کے سیکریٹری نے سیکریٹری داخلہ سے رابطہ کیا ہے جس میں انہوں نے ارکان کی سیکورٹی واپس لینے کے حوالے سے اپنے تحفظات ظاہر کیے ہیں۔

مزید پڑھیں:
پی ٹی آئی نے الیکشن کمیشن سے ن لیگ اور پیپلزپارٹی کے دستاویزات تک رسائی مانگ لی

لگتا ہے الیکشن کمیشن کی غیر اخلاقی ویڈیو پی پی کے ہتھے لگ گئی، خرم شیر زمان

دریں اثنا ء سیکریٹری داخلہ نے الیکشن کمیشن کے ارکان کی سیکورٹی کا معاملہ وزیر داخلہ کے ساتھ اٹھانے کی یقین دہانی کرائی ہے۔

واضح رہے کہ گزشتہ ماہ الیکشن کمیشن نے وفاقی وزراء چوہدری فواد حسین اور اعظم سواتی سے الیکشن کمیشن پر لگائے گئے الزامات پر جواب طلب کرلیا اور دونوں وزراء کو نوٹس جاری کردیئے تھے۔

ذرائع کے مطابق وفاقی وزیراطلاعات فواد چوہدری اور وزیر ریلوے اعظم سواتی نے الیکشن کمیشن پر سنگین نوعیت کے الزامات لگائے تھے جس پر الیکشن کمیشن نے دونوں وزراء سے الزامات کے ثبوت مانگتے ہوئے انہیں نوٹس جاری کئے۔