گوگل نیوز پر ہمیں فالو کریںاسلام آباد: رکن قومی اسمبلی عامر ڈوگر کی زیر صدارت قومی اسمبلی کی قائمہ کمیٹی برائے مذہبی امور کا اجلاس منعقد ہوا، جس میں حج انتظامات سے متعلق اہم امور پر تبادلہ خیال کیا گیا۔ اجلاس میں اعلان کیا گیا کہ وزارت مذہبی امور آنے والے دنوں میں حج اسکیم کے لیے مزید 5000 درخواستیں وصول کرے گی۔
وزارت مذہبی امور کے حکام نے یقین دہانی کرائی کہ حاجیوں کے لیے کھانے کے معیار پر کوئی سمجھوتہ نہیں کیا جائے گا اور کھانے کے اعلیٰ معیار کو ہر حال میں یقینی بنایا جائے گا۔
کمیٹی کی رکن آسیہ ناز تنولی نے سوال اٹھایا کہ پاکستان کے پاس مکہ اور مدینہ میں اپنے مخصوص پاکستان ہاؤسز کیوں نہیں ہیں؟اس کے جواب میں سیکرٹری مذہبی امور نے وضاحت کی کہ سعودی قوانین کے تحت مکہ اور مدینہ میں اپنی زمین پر پاکستان ہاؤسز کی تعمیر کی اجازت نہیں ہے۔
اجلاس میں پاکستانی حاجیوں کو بہتر تربیت فراہم کرنے پر بھی زور دیا گیا۔کمیٹی کے رکن مجاہد علی نے کہا کہ حاجیوں کو حج کے اہم احکام اور طریقہ کار کے حوالے سے مناسب تربیت دی جانی چاہیے۔کمیٹی کے چیئرمین عامر ڈوگر نے اس حوالے سے پیش رفت کا اعتراف کرتے ہوئے کہا کہ حاجیوں میں شعور بیدار کرنے کے لیے اقدامات کیے جا رہے ہیں اور حج کیمپوں میں تربیت فراہم کی جا رہی ہے۔
سیکرٹری مذہبی امور نے بتایا کہ پہلے مفت فراہم کی جانے والی سہولیات، جیسے پانی کے کولر، اب ادائیگی کے ساتھ دستیاب ہوں گی۔انہوں نے یقین دلایا کہ آئندہ تمام ضروری سہولیات وزارت کی جانب سے فراہم کی جائیں گی۔یہ اجلاس حج انتظامات کو بہتر بنانے اور حاجیوں کی سہولت کے لیے وزارت کے اقدامات پر توجہ مرکوز کرنے کے عزم کا مظہر تھا۔
