حکومت نے چھابڑی فروشوں کیلئے بھی قانونی مسودہ تیارکرلیا، 500 روپے ماہانہ فیس مقرر

اسلام آباد: وفاقی حکومت نے چھوٹے کاروبار کے فروغ کے سلسلے میں ملک میں چھابڑی فروشوں کے کام کو باضابطہ بنانے کا فیصلہ کرلیاہے۔ چھابڑی فروشوں کے حقوق کے تحفظ کے ساتھ کاروبار کو بھی لائسنس سے مشروط کر دیا گیا ہے۔

چھابڑی فروشوں کے لیے تیار قانونی مسودہ کے مطابق کاروبارکے لیے 5 سال کا لائسنس لینا ہو گا، 500 روپے ماہانہ فیس دینا ہوگی اوریہ لائسنس کسی اور کے نام منتقل بھی نہیں ہو سکے گا۔

مزید پڑھیں: سنتا جا شرماتا جا!۔ایف بی آر کے 196 ملازمین بھی بینظیر انکم سپورٹ پروگرام سے مستفید

بلدیاتی حکومت چھابڑی فروش کا علاقہ بدل سکے گی، قانون پرعمل نہ کرنے پر سامان ضبط کر لیا جائے گا تاہم نقل مکانی پر رضامندی کی صورت میں بلدیاتی عملہ سامان و نقصان ادا کرنے کا پابند ہوگا۔

چھابڑی فروشوں کوبے جا تنگ کرنے پر بلدیاتی عملہ کے لیے بھی سزا کی تجویز کی گئی ہے۔

قانون کے مسودے میں کہا گیا ہے کہ کسی وجہ کے بغیر اشیا ضبط کرنے والے متعلقہ اہلکار کو 20 ہزار جرمانہ ہو گااور چھابڑی فروش کی اشیا ضبط کرنا قابل ضمانت جرم ہوگا۔