سوشل میڈیا پلیٹ فارمز کے ذریعے ہونے والی آمدنی پر ٹیکس بڑھانے پر غور شروع

اسلام آباد: آئی ایم ایف کی شرائط پر عملدرآمد کیلئے حکومت نے سوشل میڈیا پلیٹ فارمز کے ذریعے ہونے والی آمدنی پرٹیکس بڑھانے پر غور شروع کردیا۔

تفصیلات کے مطابق حکومت پاکستان کی جانب سے آئی ایم ایف کی ایک اور کڑی شرط کو منظور کیے جانے کا امکان ہے۔

ذرائع کے مطابق آن لائن اور سوشل میڈیا سمیت آن لائن گیمنگ اور ٹک ٹاک جیسی سوشل میڈیا ایپس کے ذریعے آمدنی حاصل کرنے والوں پر ٹیکس بڑھانے کی تجویز سامنے آئی ہے جبکہ یوٹیوب کی اندورنِ ملک ادائیگیوں پر بھی ٹیکس بڑھانے پر غور کیا جارہا ہے۔

یہ بھی پڑھیں: ہم مالی بحران سے نکل آئے ہیں، مفتاح اسماعیل کا دعویٰ

ایسی اطلاعات سامنے آرہی ہیں کہ اِن سوشل میڈیا ایپس کے دفاتر پاکستان میں قائم کیے جائیں گے اور اِن سے آمدنی پاکستانی کرنسی میں کی جائے گی۔

دوسری جانب وفاقی دارالحکومت اسلام آباد میں ملکی معیشت کے متعلق پری بجٹ بزنس کانفرنس آج ہوگی۔ وزیر اعظم شہباز شریف بھی کانفرنس میں شریک ہو کر شرکاء سے خطاب کریں گے۔

آج اسلام آباد میں ہونے والی پری بجٹ کانفرنس میں ملکی برآمدات اور کاروبار میں تیزی لانے سے متعلق امور زیرِ غور آئیں گے۔ بزنس کانفرنس کا مقصد ملک کو درپیش معاشی چیلنجز سے نمٹنے کی حکمتِ عملی تیار کرنا ہے۔

ملک بھر سے کاروباری برادری پری بجٹ بزنس کانفرنس میں شریک ہوگی۔ وزیر اعظم شہباز شریف کانفرنس سے خطاب بھی کریں گے جبکہ  ملک بھر کی کاروباری برادری سے آئندہ 3 روز میں پیش کیے جانے والے بجٹ پر مشاورت بھی کی جائے گی۔