مشکل فیصلے کرنا ہوں گے۔وزیر خزانہ نے پیٹرول کی قیمت بڑھانے کا عندیہ دے دیا

واشنگٹن: وفاقی وزیرِ خزانہ مفتاح اسماعیل نے پیٹرولیم مصنوعات کی قیمتیں بڑھانے کا عندیہ دیتے ہوئے کہا ہے کہ ہمیں مشکل فیصلے کرنا ہوں گے۔ پیٹرول پر سبسڈی تو دی جاری ہے تاہم 70فیصد لوگ گاڑیوں والے ہیں۔

تفصیلات کے مطابق وفاقی وزیر خزانہ مفتاح اسماعیل نے پیٹرولیم مصنوعات کی قیمتیں بڑھانے کا اشارہ دیتے ہوئے آئی ایم ایف سے ملاقات کے بعد اپنے پہلے بیان میں کہا کہ ہم کارخانوں کی تعداد بڑھا دیں گے تاکہ لنگر خانے کم ہوجائیں۔

یہ بھی پڑھیں:

آئی ایم ایف کا وفد سبسڈیز پر مذاکرات کیلئے آئندہ ماہ پاکستان کا دورہ کرے گا

غریب افراد کی مدد کرنے کے حوالے سے وزیرِ خزانہ نے کہا کہ بے نظیر انکم سپورٹ پروگرام کی رقم بھی بڑھائی جاسکتی ہے۔انہوں نے سابق وزیر اعظم کے دور میں آئی ایم ایف سے مذاکرات کے متعلق کہا کہ ہم آئی ایم ایف کے ساتھ کیے گئے  عمران خان حکومت کے معاہدے نبھانے کے پابند ہیں۔

وفاقی وزیرِ خزانہ نے کہا کہ رواں برس ہمارا ٹیکس ریٹ بڑھانے کا کوئی ارادہ نہیں ہے۔ آئی ایم ایف سے ہم نے درخواست کی تھی کہ فنڈز کی رقم بڑھائی جائے۔ قبل ازیں مفتاح اسماعیل کی زیر قیادت پاکستانی وفد کے آئی ایم ایف سے مذاکرات کا اعلامیہ جاری کردیا گیا۔

بین الاقوامی مالیاتی فنڈ کا اپنے اعلامیے میں کہنا ہے کہ پاکستانی وزیر خزانہ سے اقتصادی پالیسیوں پر ملاقاتیں نتیجہ خیز رہیں۔ پاکستانی حکام نے موجودہ معاشی چیلنجز سے نمٹنے کے عزم کا اظہار کیا ہے۔ مذاکرات میں غیر فنڈ شدہ سبسڈیز واپس لینے کیلئے فوری اقدامات پر اتفاق کر لیا گیا۔