پی ایس او کو دیوالیہ سے بچانے کیلئے 30ارب امداد منظور، عوام سے وصولی کا فیصلہ

اسلام آباد: وفاقی حکومت نے پاکستان اسٹیٹ آئل (پی ایس او) کو دیوالیہ ہونے سے بچانے کیلئے 30 ارب روپے کی ہنگامی امداد منظور کر لی ہے۔ فیصلہ کیا گیا کہ امداد کی رقم عوام سے وصول کی جائے گی۔

تفصیلات کے مطابق حکومت نے پی ایس او کو بچانے کیلئے 30 ارب کی ہنگامی امداد گزشتہ روز منظور کی۔ رقم عوام سے ٹیکس لگا کر وصول کی جائے گی۔ 30 ارب ٹیکس وصولی کیلئے وزارتِ خزانہ اور ایف بی آر سے تجاویز بھی طلب کر لی گئیں۔

یہ بھی پڑھیں:

وفاقی کابینہ نے پیٹرولیم ڈیلرز کے مارجن میں اضافے کی منظوری دیدی

خیال رہے کہ اس سے قبل حکومت نے عوام پر مہنگائی کا مزید بوجھ ڈال دیا، جو پہلے ہی بدترین مہنگائی کی وجہ سے پریشان تھے۔ وفاقی کابینہ نے پیٹرول اور ڈیزل پر ڈیلرز کے مارجن میں 7 روپے فی لیٹر اضافے کی منظوری دے دی۔

قبل ازیں وفاقی وزیرِ خزانہ مفتاح اسماعیل کا اپنے ایک بیان میں کہنا تھا کہ میری ترجیح عوام کو مہنگائی سے بچانا یا شرحِ نمو میں بہتری نہیں بلکہ ملک کو ڈیفالٹ سے بچانا تھا۔ حکومت کا ماننا ہے کہ معاشی مسائل عارضی ہیں جو جلد ختم ہوجائینگے۔ 

وفاقی حکومت نے ہفتے کے روز ڈیزل پر ڈیلر مارجن میں 2 روپے 87 پیسے اضافے کی منظوری دی جبکہ پیٹرول پر ڈیلر مارجن 2.10 روپے فی لیٹر بڑھا دیا گیا۔ ڈیلرز کے مارجن میں اضافے کا اطلاق آج (یکم اگست) سے ہوگا۔