وزیرِ مملکت شیریں مزاری کا صحافیوں کے حق میں بل منظور ہونے پر اظہارِ مسرت

اسلام آباد: وزیرِ مملکت برائے انسانی حقوق ڈاکٹر شیریں مزاری نے کابینہ میں صحافیوں کے حق میں بل منظور ہونے پر مسرت کا اظہار کیا ہے۔

سماجی رابطے کی ویب سائٹ ٹوئٹر پر گزشتہ روز اپنے پیغام میں وزیرِ مملکت ڈاکٹر شیریں مزاری نے کہا کہ خوشی ہے کہ کابینہ نے صحافیوں اور میڈیا نمائندگان کے لیے بل منظور کرنے کا اصولی فیصلہ کیا۔

وفاقی وزیر برائے انسانی حقوق شیریں مزاری نے کہا کہ یہ بل صحافی برادری کے ساتھ مشاورت سے ترتیب دیا گیا تھا جسے حتمی شکل دینے کے لیے مشاورت کے عمل میں کچھ وقت بھی لگ گیا۔

وزیر انسانی حقوق ڈاکٹر شیریں مزاری نے بتایا کہ بل پیش کرنے کے لیے وزیر سائنس و ٹیکنالوجی فواد چوہدری نے اس وقت  ہم سے درخواست کی تھی جب وہ وزیر اطلاعات تھے۔ 

Glad cabinet approved IN PRINCIPLE our Journalist and media professionals Bill today. Was done in consultation with journalists and took a while to get it into final shape with inputs from journalists incorporated. @fawadchaudhry requested us to do this when he was info min.

— Shireen Mazari (@ShireenMazari1) February 25, 2020

صحافی برادری اور میڈیا نمائندگان  بل میڈیا نمائندگان کی آزادئ اظہارِ رائے، غیر جانبداری، حفاظت اور دیگر اہم امور کا احاطہ کرتا ہے جس کے تحت حکومت سے صحافی برادری کی حفاظت کا مطالبہ کیا گیا ہے۔

میڈیا نمائندگان بل آئینِ پاکستان کے آرٹیکل 19 کے تحت شہری و سیاسی حقوق کے لیے مجوزہ قانون سازی کا مطالبہ کرتا ہے جس کے تحت معلومات کی تحقیق، وصولی اور ترسیل سمیت دیگر معاملات پر اہم مطالبات موجود ہیں۔

بل کے مطابق میڈیا نمائندگان کا تعلق پرنٹ میڈیا، الیکٹرانک میڈیا یا آرٹ کی کسی بھی قسم سے ہو، ان کی حفاظت حکومت کا فرض ہے۔ بل کے تحت صحافی برادری کا تحفظ یقینی بنایا جائے گا۔

نظامِ جمہوریت کے تحت ریاست کے چوتھے ستون صحافت کی آزادی کسی بھی جمہوری نظامِ حکومت کے لیے ضروری قرار دی گئی ہے۔ بل کے تحت صحافی برادری پر حملوں کی مذمت کی گئی ہے۔