وزیر اعظم کی زیر صدارت وفاقی کابینہ کا اجلاس، گیس بحران پر گرماگرم بحث

اسلام آباد: وزیر اعظم عمران خان کی زیر صدارت وفاقی کابینہ کے اجلاس میں گیس بحران پر گرما گرم بحث ہوئی۔ کابینہ اراکین نےمبینہ طور پر گیس کی لوڈ شیڈنگ پر سوالات اٹھا دئیے۔

تفصیلات کے مطابق وزیر اعظم عمران خان کی زیر صدارت گزشتہ روز منعقدہ وفاقی کابینہ اجلاس کی اندرونی کہانی سامنے آگئی۔ نجی ٹی وی ذرائع کا کہنا ہے کہ وفاقی کابینہ اجلاس میں حکومتی اراکین نے گیس بحران پر سوال و جواب کیے۔ 

یہ بھی پڑھیں:

پیپلز پارٹی کراچی سے مفتوحہ علاقے جیسا سلوک کرتی ہے، مصطفیٰ کمال

تحریک انصاف ایک ملک گیر پارٹی کے طور سامنے آچکی ہے، حلیم عادل شیخ

نجی ٹی وی ذرائع کے مطابق کابینہ اراکین کا شکوہ تھا کہ کراچی کے ساتھ یوریا پلانٹس بھی گیس سے محروم ہیں، وزیر اعظم کے مشیرِ تجارت و سرمایہ کاری عبدالرزاق داؤد نے برآمدی صنعت سے معاہدے کی خلاف ورزی پر تنقید کی۔

وفاقی کابینہ اجلاس کے دوران مشیرِ تجارت عبدالرزاق داؤد کا کہنا تھا کہ ایکسپورٹ انڈسٹری کو گیس نہیں ملے گی تو ایکسپورٹس متاثر ہوں گی۔ ذرائع کے مطابق حماد اظہر نے مشیرِ تجارت کے اٹھائے گئے سوالات کے جوابات دئیے۔

ذرائع کے دعوے کے مطابق وزیرِ توانائی حماد اظہر نے انڈسٹری کے دعوے اور حکومتی سروے کا تقابل پیش کرتے ہوئے کہا کہ انڈسٹری کہتی ہے 35فیصد کاروبار بند ہے جبکہ سرکاری سروے کہتا ہے کہ انڈسٹری میں 95فیصد کام جاری و ساری ہے۔

دعوے کے مطابق حماد اظہر نے برآمدی صنعت کے کیپٹو پلانٹس کو گیس بندش کا اقرار کرتے ہوئے کہا کہ پراسیسنگ یونٹس کو سپلائی جاری رکھی گئی ہے۔ وزیر اعظم نے گیس سپلائی کے معاملات پر نظر ثانی کا حکم دیتے ہوئے 3 رکنی کمیٹی تشکیل دے دی۔

مذکورہ کمیٹی میں مشیرِ خزانہ شوکت ترین، وزیر توانائی حماد اظہر اور مشیر تجارت و سرمایہ کاری رزاق داؤد کو شامل کیا گیا۔ذرائع کا کہنا تھا کہ وزیر اعظم نے خیبر پختونخوا الیکشن پر صرف پرویز خٹک کو سراہا ۔ کابینہ میں دیگر معاملات بھی زیر غور آئے۔