گوگل نیوز پر ہمیں فالو کریںپاک فوج کے گزشتہ روز شہید ہونے والے 2 جوانوں کی نمازِ جنازہ ادا کردی گئی جن کی تدفین ان کے آبائی علاقوں میں عمل میں لائی گئی۔
لائن آف کنٹرول (ایل او سی) پر گزشتہ روز دشمن ملک بھارت کی طرف سے شر انگیزی کے نتیجے میں پاک فوج کے 2 جوان شہید ہوئے جنہیں اعزاز و اکرام کے ساتھ وطن کی مٹی کے حوالے کیا گیا۔
تدفین سے قبل دونوں جوانوں کی نمازِ جنازہ میں بڑی تعداد میں عسکری حکام، عوام الناس اور رشتہ دار شریک ہوئے۔نمازِ جنازہ کے بعد ائمہ کرام نے شہداء کے ایصالِ ثواب اور درجات کی بلندی کے لیے دُعائیں کیں۔
بعد ازاں شہید ہونے والے نائب صوبیدار کندیرو کو پنو عاقل میں سپردِ خاک کردیا گیا جبکہ پنجاب سے تعلق رکھنے والے پاک فوج کے سپاہی محمد احسان کی تدفین جہلم کے علاقے پنڈ دادن خان میں عمل میں لائی گئی۔
یاد رہے کہ اس سے قبل ڈی جی آئی ایس پی آر میجر جنرل آصف غفور نے کہا کہ لائن آف کنٹرول پر بھارت کی طرف سے سیز فائر معاہدے کی خلاف ورزیاں جاری ہیں، بھارتی فائرنگ کے نتیجے میں پاک فوج کے 2 جوان شہید ہوئے۔
سماجی رابطے کی ویب سائٹ ٹوئٹر پر گزشتہ روز پیغام میں ترجمان پاک فوج میجر جنرل آصف غفور نے کہا کہ گزشتہ 36 گھنٹوں سے بھارت سیز فائر معاہدے کی خلاف ورزیاں کیں جس کا پاک فوج نے بھرپور جواب دیا۔
مزید پڑھیں: بھارتی فائرنگ سے پاک فوج کے 2 جوان شہید ہو گئے۔آئی ایس پی آر
