آرمی ایوی ایشن ہیلی کاپٹر حادثہ، شہید افسران کی نمازِ جنازہ ادا

راولپنڈی: گزشتہ روز آرمی ایوی ایشن ہیلی کاپٹر حادثے میں شہید ہونے والے تمام 6افراد کی میتیں مل گئیں۔ بلوچستان میں سیلاب زدگان کی امداد کیلئے جانے والے شہید افسران کی نمازِ جنازہ ادا کردی گئی ہے۔

تفصیلات کے مطابق جامِ شہادت نوش کرنے والے افسران کی نمازِ جنازہ ملیر گیریژن میں ادا کی گئی۔ شہداء کی میتوں کو آبائی علاقوں کی جانب روانہ کردیا گیا۔ تمام افسران کی شہادت کی تصدیق گزشتہ روز آئی ایس پی آر نے کی۔

یہ بھی پڑھیں:

حکومت کی کوششیں کامیاب،تجارتی خسارے میں ریکارڈ کمی

پاک فوج کے شعبۂ تعلقاتِ عامہ (آئی ایس پی آر) کے بیان کے مطابق ہیلی کاپٹر حادثے میں شہید ڈی جی کوسٹ گارڈز میجر جنرل امجد حنیف آزاد کشمیر کے شہر راولا کوٹ سے تعلق رکھتے تھے۔

1994 میں آزادکشمیر ریجمنٹ میں کمیشن حاصل کرنے والے میجر جنرل امجد حنیف نے سوگواران میں ایک بیوہ کے علاوہ ایک بیٹا اور 2 بیٹیاں چھوڑی ہیں جبکہ شہید کمانڈنگ انجینئر 12 کور برگیڈئیر محمد خالد فیصل آباد سے تعلق رکھتے تھے۔

برگیڈئیر محمد خالد بھی 1994 میں 20 انجینئر بٹالین کا حصہ بنے۔ انہوں نے تین بیٹیوں، تین بیٹوں اور ایک بیوہ کو سوگوار چھوڑا ہے جبکہ شہید پائلٹ میجر سعید سندھ کے شہر لاڑکانہ سے تعلق رکھتے تھے۔

شہید پائلٹ میجر سعید نے سوگواران میں بیوہ، ایک بیٹی اور ایک بیٹا، معاون پائلٹ میجر محمد طلحہ منان نے بیوہ اور دو بیٹے  جبکہ نارووال سے تعلق رکھنے والے شہید کریو چیف نائیک مدثر فیاض نے بیوہ کو سوگوار چھوڑا ہے۔