پاکستان کی تاریخ میں پہلی بار ڈیجیٹل قومی شناختی کارڈ تیار، جانئے خصوصیات

نادرا نے اپنی سلور جوبلی کے موقع پر پاکستان میں پہلی بار ڈیجیٹل شناختی کارڈ کا اجراء کیا ہے جس کو ’ڈی مٹیریلائزڈ آئی ڈی کارڈ‘ کا نام دیا گیا ہے، جو کارڈ ڈیجیٹل شناخت کی جانب اہم قدم ہے۔

اس کے تحت نئے ڈیجیٹل آئی ڈی کارڈ کو پاک آئی ڈی موبائل ایپ میں ضم کیا جائے گا، جس سے شہری اپنے شناختی کارڈ اپنے اسمارٹ فونز میں محفوظ کرسکیں گے، پاک آئی ڈی موبائل ایپ میں فیچر شامل کیے جانے کے بعد شہریوں کو موبائل میں شناختی کارڈ رکھنے کی سہولت حاصل ہوگی۔
نادرا ہیڈکوارٹرز میں ہونے والی تقریب میں وفاقی وزیرداخلہ محسن نقوی نے بتایا کہ ڈیجیٹل تصدیقی نظام جلد متعارف کرایا جائے گا، ڈی مٹیریلائزڈ کارڈ کی تصدیق کا مربوط نظام بھی وضع کیا جارہا ہے۔

نادرا کے وسیع نیٹ ورک کی بدولت شناختی خدمات آج ہرپاکستانی کی پہنچ میں ہیں، قومی سلامتی اور قانون نافذ کرنے والے اداروں کیلئے نادرا کی معاونت لائق تحسین ہے۔
بتایا گیا ہے کہ تقریب میں صدر مملکت اور وزیر اعظم نے بھی تہنیتی پیغامات دیئے، صدر آصف زرداری نے کہا کہ شہریوں کو قانونی اور محفوظ شناخت کی فراہمی کیلئے نادرا کی خدمات لائق تحسین ہیں۔

یہ بھی کہا گیا کہ نادرا ریاست اور عوام کے درمیان اعتماد کے رشتے کو مضبوط بنا رہا ہے، نادرا جدید ٹیکنالوجی کے استعمال کو مزید وسعت دے کر اپنی کارکردگی میں بہتری لائے۔

وزیراعظم شہباز شریف نے کہا کہ نادرا نے پاکستان، نائجیریا، کینیا کے شناختی نظام کو تشکیل دیا، نادرا دنیا کی آبادی کے تیسرے بڑے حصے کو خدمات فراہم کر رہا ہے، ٹیکنالوجی کے میدان میں نادرا کی مہارت ملکی معیشت کی ترقی میں بنیادی کردار ادا کرے گی۔