ملک بھر میں سیلاب کی تباہ کاریاں جاری، 1ہزار486افراد جاں بحق، 12ہزار749زخمی

اسلام آباد: ملک بھر میں بارشوں اور سیلاب کے دوران مختلف حادثات اور تباہ کاریوں سے 1 ہزار 486 افراد جاں بحق جبکہ 12 ہزار 749 زخمی ہوگئے، امدادی کارروائیاں جاری ہیں۔

تفصیلات کے مطابق نیشنل ڈزاسٹر مینجمنٹ اتھارٹی (این ڈی ایم اے) نے ملک بھر میں بارشوں اور سیلاب کے نقصانات پر رپورٹ جاری کردی۔ گزشتہ 1 روز کے دوران مختلف حادثات میں مزید 5 شہری انتقال کر گئے۔

یہ بھی پڑھیں:

کراچی کے گودام سے ذخیرہ کی گئی ڈھائی لاکھ گولیاں برآمد

نیشنل ڈزاسٹر مینجمنٹ اتھارٹی کا اپنی رپورٹ میں کہنا ہے کہ خیبر پختونخوا میں مزید 2 جبکہ بلوچستان میں 3 شہری جاں بحق ہوئے۔ سیلاب کے باعث سب سے زیادہ 638 افراد سندھ میں جاں بحق ہوئے۔

این ڈی ایم اے کا رپورٹ میں کہنا ہے کہ خیبر پختونخوا میں سیلاب کے دوران مختلف حادثات میں اموات کی تعداد 305 تک جا پہنچی، بلوچستان میں 281 جبکہ پنجاب میں 191 افراد جان کی بازی ہار گئے۔

سیلاب کے باعث ملک بھر میں 12 ہزار 718 کلومیٹر طویل سڑکوں کو نقصان پہنچا جبکہ 9 لاکھ 18 ہزار 473 مویشی سیلابی پانی میں بہہ گئے۔  ملک کے 80 اضلاع جبکہ 3 کروڑ 30 لاکھ افراد سیلاب سے متاثر ہوئے۔ 

رپورٹ میں کہا گیا ہے کہ سیلاب کے باعث گلگت بلتستان کے 22 جبکہ آزاد کشمیر کے 48 شہری انتقال کر گئے۔ ملک بھر میں مجموعی طور پر 1 ہزار 486 افراد جاں بحق جبکہ 12ہزار 749 زخمی ہوئے۔