گوگل نیوز پر ہمیں فالو کریںدریائے ستلج میں بہاولنگر کے مقام پر نچلے درجے کے سیلاب کے باعث نشیبی علاقے زیرِ آب آگئے جن میں دریائے بیلٹ پر موجود چھوٹی آبادیاں شامل ہیں۔
تفصیلات کے مطابق دریائے ستلج میں سیلاب کے باعث چھوٹی آبادیوں کے مکینوں کو نقل مکانی کرنی پڑ رہی ہے جبکہ سیلابی پانی کے باعث فصلوں کو بھی بھاری نقصان پہنچا۔ چشتیاں کے حفاظتی بند میں 300 فٹ کا شگاف پڑ گیا۔
راولپنڈی اسلام آباد میں تیز بارش، ندی نالوں میں طغیانی
سیلاب کے باعث متعدد فصلیں زیرِ آب آنے سے لاکھوں کا نقصان ہوا ہے جبکہ متعدد علاقوں کا گردونواح سے زمینی رابطہ منقطع ہوچکا ہے۔ ضلعی انتظامیہ، ریسکیو ٹیمیں اور پاک فوج کے جوان سیلاب زدگان کی امداد کیلئے پہنچ گئے۔
ریسکیو کا عمل جاری ہے۔ بہاولپور کے مقام پر بھی دریائے ستلج میں پانی کا بہاؤ تیز ہوگیا۔ یونین کونسل منگوانی کا بہاولپور سے زمینی رابطہ کٹ گیا جس کے بعد دریائے ستلج میں کشتی سروس کو فعال کردیا گیا ہے۔
پنجاب کے مختلف شہر اس وقت سیلاب سے متاثر ہورہے ہیں جن میں بورے والا، چیچہ وطنی، مہرو بلوچ، بہاولپور اور بہاولنگر شامل ہیں۔ امدادی سرگرمیوں کے دوران ہزاروں افراد کو محفوظ مقامات پر منتقل کردیا گیا۔
