اسلامی ممالک کے ساتھ تعلقات کے فروغ کیلئے نئی راہیں تلاش کی جائیں،ایس ایم منیر

کراچی: یونائٹیڈ بزنس گروپ کے سرپرست اعلیٰ اور سابق صدر ایف پی سی سی آئی ایس ایم منیر نے اسلامی ممالک کے ساتھ تعلقات کے فروغ کے لیے نئی راہیں تلاش کرنے کا مطالبہ کیا ہے۔

ایس ایم منیر نے تجارتی اداروں کو مشورہ دیا کہ وہ اپنے اراکین کی حوصلہ افزائی کریں کہ وہ اسلامی ممالک میں اپنے ہم منصبوں اور پاکستان کے مشنوں کے ساتھ بات چیت کو تیز کریں۔

ان کا مزید کہنا تھا کہ اسلامی ممالک کے ساتھ پاکستان کی تجارت کی کم سطح کی وجہ معلومات کی کمی اور پاکستان اور مسلم ممالک کے نجی شعبے کے درمیان تعلقات کا کم ہونا ہے لیکن باہمی روابط کو بڑھانے کی ضرورت ہے تاکہ اسلامی ممالک کے ساتھ پاکستان کی دوطرفہ تجارت مزید فروغ پاسکے۔

انہوں نے کہا کہ پاکستان نے ملائیشیا کے ساتھ ایف ٹی اے اور انڈونیشیا اور ایران کے ساتھ پی ٹی اے پر دستخط کیے ہیں جبکہ ترکی اور خلیج تعاون کونسل کے ارکان کے ساتھ ایف ٹی اے کے لیے بات چیت جاری ہے۔

مسلم ممالک کے پاس بے پناہ وسائل اور صلاحیتیں ہیں جنہیں تلاش کرنے اور انہیں حقیقی اثاثے میں تبدیل کرنے کی ضرورت ہے، مواقع پیدا کرکے مسلم کمیونٹیز کے ساتھ معاشی روابط کو فروغ دینے سے اسلامی دنیا سے زیادہ سے زیادہ سرمائے کی آمد میں مدد مل سکتی ہے۔

ایس ایم منیر نے مزید کہا کہ او آئی سی 57 ریاستوں کی رکنیت کے ساتھ دوسری سب سے بڑی بین الحکومتی تنظیم ہے اس لیے اسے مسلم دنیا کی اجتماعی آواز کا درجہ حاصل ہے تاکہ معاشی، سماجی اقتصادی اور سیاسی شعبوں میں ان کے مفادات کی حفاظت کی جا سکے۔

انہوں نے کہا کہ پاکستان او آئی سی کے رکن ممالک کے درمیان تجارتی اور اقتصادی تعلقات کو مضبوط بنانے میں اہم کردار ادا کرتا ہے،پاکستان میں اسلامک چیمبر آف کامرس اینڈ انڈسٹری کا ہیڈ آفس قائم ہے اور اس کے تمام مسلم ممالک کے ساتھ مضبوط اور اہم سیاسی تعلقات ہیں لیکن یہ تعلقات اس حقیقت کے باوجود تجارتی اور اقتصادی تعلقات کے حوالے سے ظاہر نہیں ہوتے۔

انہوں نے کہا کہ اس وقت پاکستان اور او آئی سی ممالک کے درمیان تجارت 28 ارب امریکی ڈالر ہے، او آئی سی ممالک کو برآمدات 5.6 بلین امریکی ڈالر اور او آئی سی ممالک سے درآمدات 22.7 بلین ڈالر ہیں۔

اناج، کپاس، معدنی ایندھن، چینی، خوردنی سبزیاں اور پھل، کھانا، ٹیکسٹائل وغیرہ او آئی سی ممالک کو پاکستان کی برآمدات کی اہم اشیاء ہیں جبکہ پٹرولیم مصنوعات، جانوروں کی چربی، پلاسٹک، نامیاتی اور غیر نامیاتی کیمیکل، آئرن اور سٹیل، مشینری، برقی آلات۔ درآمد کی اہم اشیاء ہیں۔

مزید پڑھیں: ملک میں سیاسی کشمکش اورچپقلش کے بجائے معیشت کو سنبھالنے کی ضرورت ہے،افتخار علی ملک

ایس ایم منیر نے مزید کہا کہ تجارت کی سمت بہت سے عوامل سے متاثر ہوتی ہے جن میں لاگت، مارکیٹ تک رسائی، کنیکٹیویٹی، معیار، معیارات اور مقابلہ شامل ہے لیکن اگر کاروباری برادری اور پالیسی ساز مارکیٹ کے مواقع کی نشاندہی کرنے اور تجارتی رکاوٹوں کو دور کرنے کے لیے مل کر کام کریں تو ممکنہ طور پر او آئی سی ممالک کے درمیان تجارت کے لیے مزید مواقع پیدا ہوں گے۔