وفاقی وزیرِ قانون فروغ نسیم نے ایک بار پھر عہدے سے استعفیٰ دے دیا

جسٹس قاضی فائز عیسیٰ کیس میں وفاق کی نمائندگی کرنے کیلئے وفاقی وزیرِ قانون فروغ نسیم نے ایک بار پھر اپنے عہدے سے استعفیٰ دے دیا ہے۔

وفاقی وزیرِ قانون فروغ نسیم نے آج اپنا استعفیٰ منظوری کیلئے وزیرِ اعظم عمران خان کو بھجوا دیا ہے جبکہ جسٹس قاضی فائز عیسیٰ کیس میں صدارتی ریفرنس کی سماعت کیلئے فروغ نسیم بطور وکیل پیش ہوں گے۔

عدالت نے جسٹس قاضی فائز عیسیٰ کیس میں وزیرِ قانون فروغ نسیم کو ہدایت کی تھی کہ اپنا لائسنس بحال کروائیں جبکہ اٹارنی جنرل خالد جاوید پہلے ہی حکومت کی نمائندگی سے معذرت کرچکے ہیں۔

قبل ازیں گزشتہ برس نومبر میں وزیرِ قانون فروغ نسیم اپنے عہدے سے مستعفی ہو گئے تھے جس کے بعد انہوں نے آرمی چیف کی مدتِ ملازمت میں توسیع کے کیس کی پیروی کی۔

بعد ازاں متحدہ قومی موومنٹ (پاکستان) کے سینئر رہنما و وزیرِ قانون فروغ نسیم کو ایک بار پھر وفاقی کابینہ کا حصہ بنا لیا گیا جبکہ آج انہوں نے ایک بار پھر وکیل بن کر وفاق کی نمائندگی کیلئے استعفیٰ دے دیا۔