فرائض میں غفلت کا الزام، ایف بی آر اپنے ملازمین کیخلاف کارروائی کیلئے تیار

اسلام آباد: فیڈرل بورڈ آف ریونیو (ایف بی آر) نے بدعنوانی اور فرائض میں غفلت کے الزامات ثابت ہونے پر اپنے ملازمین کے خلاف کارروائی کا عندیہ دے دیا ہے۔

تفصیلات کے مطابق فیڈرل بورڈ آف ریونیو کی جانب سے جاری کردہ نوٹیفکیشن میں کہا گیا ہے کہ کرپشن، بدعنوانی اور فرائض میں غفلت برتنے کے الزامات پر 2 ماہ میں تفتیش مکمل کر لی جائے گی۔

یہ بھی پڑھیں:

گیس کی کمی، کراچی میں سی این جی اسٹیشن تین روز کیلئے بند

ایف بی آر نوٹیفکیشن میں مزید کہا گیا ہے کہ تحقیقاتی ٹیم کو متعلقہ کیسز کے ریکارڈز فراہم کرنا فیلڈ آفس کے سربراہ کی ذمہ داری ہوگی۔ متعلقہ فیلڈ آفسز کو بھی ریکارڈ فراہمی کا پابند کردیا گیا۔

نوٹیفکیشن میں ایف بی آر حکام کا کہنا ہے کہ انکوائری کا حکم سامنے آنے کے بعد فیلڈ آفس تحقیقاتی ٹیم کو ریکارڈ 7 روز کے اندر اندر فراہم کرے  جبکہ بدعنوانی میں ملوث افسران کو شوکاز نوٹس جاری کیا جائے گا۔

خیال رہے کہ ایف بی آر ملک بھر میں ٹیکس کلیکشن کیلئے اہم ترین ادارہ سمجھا جاتا ہے تاہم فیڈرل بورڈ آف ریونیو پر ماضی میں بھی ٹیکس میں خورد برد سمیت دیگر بدعنوانی اور فرائض میں غفلت برتنے کے الزامات لگتے رہے ہیں۔

شوکاز نوٹس کے اجراء کے بعد ایف بی آر کی تحقیقاتی ٹیم الزامات پر تفتیش کرے گی۔ خیال رہے کہ فیڈرل بورڈ آف ریونیو میں حال ہی میں گریڈ 19 اور 20 کے افسران کی تقرریاں اور تبادلے بھی کیے گئے ہیں۔