فواد چوہدری نے مہنگائی سے متعلق بڑی پیش گوئی کردی

اسلام آباد: پاکستان تحریک انصاف کے رہنما وسابق وفاقی وزیر فواد چوہدری نے مہنگائی سے متعلق بڑی پیش گوئی کردی۔

سابق وزیر نے اپنے ایک بیان میں کہا کہ ملک میں بہت جلد آٹے کا بھی بحران آنے والا ہے، فواد چوہدری نے کہا کہ سری لنکا میں معاشی بحران پہلے اور سیاسی بحران بعد میں آیا جبکہ پاکستان میں سیاسی بحران پہلے آیا۔

پی ٹی آئی رہنما نے کہا کہ عدم اعتماد کی تحریک آنے کے بعد روپے کی قدر میں 24 روپے کمی ہوئی، کہیں ایسا نہ ہو کہ ہمیں تیل ہی نہ ملے، آئی ایم ایف سے معاہدے کے بعد بھی عمران خان نے تیل سستا کیا، موجودہ حکومت نے آئی ایم ایف سے معاہدے کے بعد تیل مہنگا کیا۔

یہ بھی پڑھیں: وزیراعظم نے بیوروکریٹس کی تعیناتی کیلئے آئی ایس آئی کو خصوصی درجہ دے دیا

فواد چوہدری نے حکومت پر تنقید کرتے ہوئے کہا کہ یہ روس کے پاس کیوں نہیں گئے؟ بجٹ کب اور کس طرح پیش کیا جائے گا یہ فیصلہ حکومت نے کرنا ہے، اس حکومت میں صرف زرداری مزے لے رہے ہیں۔

اُن کا کہنا تھا کہ حکومت کو فوری الیکشن کا اعلان کرنا چاہیے، اگر فوری الیکشن کا اعلان نہیں کیا تو ملک کی معیشت تباہ ہو جائے گی۔