وزیر اعظم نے تحریکِ انصاف کی تمام تنظیمیں تحلیل کردیں۔فواد چوہدری

اسلام آباد: وفاقی وزیرِ اطلاعات و نشریات فواد چوہدری نے کہا ہے کہ وزیر اعظم نے تحریکِ انصاف کی تمام تنظیمیں تحلیل کردی ہیں، تمام ممبران کے عہدے ختم کردئیے گئے ہیں۔

تفصیلات کے مطابق وزیر اعظم کی زیر صدارت پارٹی اجلاس کے بعد پریس کانفرنس سے خطاب کرتے ہوئے وزیرِ اطلاعات فواد چوہدری نے کہا کہ تمام تنظیمیں تحلیل اور تمام ممبران عہدوں سے ہٹا دئیے گئے۔ تمام صوبوں میں نمائندگی رکھنے والی پی ٹی آئی کے سب پارلیمانی بورڈ تحلیل ہو گئے۔

یہ بھی پڑھیں:

ریاست اپنے مفادات کیلئے مذہبی شدت پسندی کو فروغ دے رہی ہے۔رضا ربانی

وزیراعظم کی زیرصدارت سپریم کمیٹی کااجلاس،انتخابی نتائج پر رپورٹ پیش 

پریس کانفرنس سے خطاب کے دوران فواد چوہدری نے کہا کہ وزیر اعظم کے احکامات کے تحت پی ٹی آئی ملک بھر میں نیا انتظامی ڈھانچہ تشکیل دے گی۔ اجلاس کے دوران پی ٹی آئی کے پی کے کی کارکردگی غیر تسلی بخش قرار دی گئی۔ تحریکِ انصاف کی سیاست سے ملک کی سیاست متاثر ہورہی ہے۔

خطاب کے دوران وزیرِ اطلاعات نے کہا کہ وزیر اعظم نے وزیر اعلیٰ خیبر پختونخوا سمیت دیگر عہدیداران سے بات چیت کے بعد پارٹی تحلیل کرنے کا فیصلہ کیا جس کا مقصد میرٹ کے برعکس خاندانوں میں ٹکٹ بانٹنے کی روش کی بیخ کنی ہے۔ ٹکٹ دینے کے متعلق خصوصی کمیٹی تشکیل دیں گے۔

وفاقی وزیرِ اطلاعات فواد چوہدری نے کہا کہ خصوصی کمیٹی میں تمام قومی قیادت شامل کی جائے گی۔ تحریکِ انصاف کے نئے ڈھانچے کی تشکیل کے بعد نئی تنظیمیں قائم کی جائیں گی۔ پارٹی کی قومی قیادت پر مشتمل 21رکنی آئینی کمیٹی میں وفاقی وزراء شامل ہیں جو بڑے فیصلے کرے گی۔

وزیرِ اطلاعات نے کہا کہ کے پی کے سے پرویز خٹک، مراد سعید، محمود خان، علی امین گنڈا پور اور اسد قیصر، پنجاب سے شاہ محمود قریشی، خسرو بختیار، حماد اظہر، چوہدری سرور، عامر کیانی، وزیر اعلیٰ پنجاب اور مجھے شامل کیا گیا ہے۔ بلوچستان سے قاسم سوریاور جان محمد جمالی شامل ہوگئے۔

فواد چوہدری نے کہا کہ سندھ سے وزیرِ بحری امور علی زیدی اور گورنر سندھ عمران اسماعیل جبکہ اسلام آباد سے اسد عمر کو کمیٹی میں شامل کیا گیا ہے۔ تحریکِ انصاف خاندانی سیاست پر مبنی پارٹی نہیں۔ ن لیگ کا کلچر ہم میں آگیا تو تحریکِ انصاف اور شریف خاندان میں فرق باقی نہیں ہوگا۔