آئین اتحادیوں کو اپوزیشن سے ہاتھ ملانے سے نہیں روکتا۔فروغ نسیم

کراچی: وفاقی وزیرِ قانون فروغ نسیم نے کہا ہے کہ آئین اتحادیوں کو اپوزیشن سے ہاتھ ملانے سے نہیں روکتا، آگے کیا ہونے والا ہے، معلوم نہیں تاہم وزیر اعظم گھبرائے ہوئے نہیں ہیں۔

تفصیلات کے مطابق شہرِ قائد میں فیڈرل سروس ٹریبونل کے چیئرمین قاضی خالد کے ہمراہ ٹریبونل بلڈنگ کا سنگِ بنیاد رکھنے کے موقعے پر میڈیا سے گفتگو کرتے ہوئے وزیرِ قانون فروغ نسیم نے کہا کہ میں ایم کیو ایم کے ٹکٹ پر سینیٹ کا رکن منتخب ہوا۔

یہ بھی پڑھیں:

صادق سنجرانی کی باری آگئی،اپوزیشن کا چیئرمین سینیٹ کو بھی ہٹانے کا فیصلہ

گفتگو کے دوران وزیرِ قانون فروغ نسیم نے کہا کہ وزیر اعظم کے خلاف تحریکِ عدم اعتماد پر فیصلہ کرنا ایم کیو ایم (پاکستان) کے کنوینر خالد مقبول اور رابطہ کمیٹی کا استحقاق ہے۔ ایم کیو ایم کو مشورہ ہے کہ معاہدہ ہو تو عدالت سے ڈگری کرالیں۔

وفاقی وزیرِ قانون نے کہا کہ قومی اسمبلی میں تحریکِ عدم اعتماد پر ووٹنگ ہوگی، میں سینیٹر کی حیثیت سے ووٹ نہیں دے سکتا۔ متحدہ ملکی استحکام کا ساتھ دے گی۔ بھارت نے سازش کرکے بلوچستان کے ڈیڑھ سو وکلاء کو شہید کروا دیا۔

وزیرِ قانون فروغ نسیم نے کہا کہ وکیل اور جج ایک دن میں نہیں بنتے۔ وکلاء کو را کے ہاتھوں شہید کروایا گیا۔ وزیر اعظم عمران خان گھبرائے ہوئے نہیں ہیں، تاہم آئین میں یہ نہیں ہے کہ حکومت کے اتحادی اپوزیشن سے ہاتھ نہیں ملا سکتے۔