گوگل نیوز پر ہمیں فالو کریںکراچی: سول ایوی ایشن اتھارٹی (سی اے اے) کی طرف سے لائسنسز کی منسوخی کے بعد قومی ائیر لائن نے اپنے 7 پائلٹس اور 1 ائیر ہوسٹس کو ملازمت سے برطرف کردیا ہے۔
ترجمان پاکستان انٹرنیشنل ائیر لائن (پی آئی اے) نے تصدیق کی کہ پائلٹس اور ائیر ہوسٹس کو معطلی کے خطوط جاری کردئیے گئے ہیں جبکہ یہ خطوط ڈائریکٹر جنرل کی طرف سے سرکاری منظوری کے بعد بھیجے گئے۔
قبل ازیں قومی ائیر لائن کے 48 پائلٹس کے لائسنسز نوٹس دئیے بغیر منسوخ کیے گئے تھے جنہیں جواب داخل کروانے کیلئے 14 روز کا وقت دیا گیا۔ وزیرِ ہوابازی بھی 262 پائلٹس کے لائسنسز کو جعلی قرار دے چکے ہیں۔
بدعنوانی کی تفصیلات بتاتے ہوئے وزیرِ ہوابازی نے کہا کہ مذکورہ پائلٹس نے 8 میں سے کوئی ایک بھی امتحان خود پاس نہیں کیا جن کی ضرورت لائسنسز کیلئے ہوتی ہے جبکہ 28 پائلٹس پر جعلی ڈگریوں کا شبہ تھا۔
یاد رہے کہ طیارہ حادثے کے بعد شروع ہونے والا پائلٹس کی دستاویزات اور لائسنسز کی تصدیق کا عمل جاری ہے جس کے دوران سی اے اے (سول ایوی ایشن اتھارٹی) نے 15 مزید پائلٹس کو معطل کردیا۔
تفصیلات کے مطابق گزشتہ روز تک معطل کیے گئے پائلٹس کی تعداد 90 سے زائد ہو گئی جبکہ ایوی ایشن ڈویژن کے ترجمان عبدالستار کھوکھر کا کہنا تھا کہ تفتیشی بورڈ نے 262 پائلٹس کے لائسنس مشکوک قرار دئیے تھے۔
مزید پڑھیں: مشتبہ لائسنسز کی تصدیق جاری، سول ایوی ایشن نے 15 مزید پائلٹس کو معطل کردیا
