گوگل نیوز پر ہمیں فالو کریںاسلام آباد: سابق وزیرِ آبی امور اور پی ٹی آئی رہنما فیصل واؤڈا کی پارٹی رکنیت معطل کردی گئی ہے۔ ان کو 2 روز کے اندر شوکاز نوٹس کا جواب دینے کی ہدایت کی گئی جس پر فیصل واؤڈا کا ردِ عمل سامنے آگیا ہے۔
تفصیلات کے مطابق جنرل سیکریٹری اسد عمر کا گزشتہ روز کہنا تھا کہ فیصل واؤڈا کی پریس کانفرنس پارٹی پالیسی کے خلاف تھی۔ گزشتہ شب پریس کانفرنس کے دوران فیصل واؤڈا کا کہنا تھا کہ ارشد شریف کے قتل کی سازش پاکستان میں ہوئی۔
ارشد شریف کے قتل میں اسٹیبلشمنٹ کا کردار نہیں، مزید لاشیں گرینگی، فیصل واوڈا کا دعویٰ
حکومت مخالف احتجاج کے متعلق فیصل واؤڈا نے کہا کہ پی ٹی آئی کے لانگ مارچ میں خون اور لاشیں نظر آرہی ہیں۔ تحریکِ انصاف نے پارٹی رکنیت معطل کردی۔ شوکاز پروضاحت سے قبل فیصل واؤڈا پارٹی دفتر اور میڈیا میں پارٹی مؤقف نہیں دے سکیں گے۔
پی ٹی آئی کے سیکریٹری جنرل اسد عمر کا ٹوئٹر پیغام میں کہنا تھا کہ فیصل واؤڈا کی پریس کانفرنس پی ٹی آئی پالیسی کی نمائندگی نہیں کرتی، نہ یہ پارٹی کا مؤقف ہے۔ عمران خان کی ہدایت پر پی ٹی آئی سندھ کے صدر نے شوکاز نوٹس جاری کیا۔
دوسری جانب فیصل واؤڈا کا نجی ٹی وی چینل کو انٹرویو دیتے ہوئے کہنا تھا کہ میری نیت اللہ جانتا ہے، پارٹی کو نہیں، عمران خان کو جواب دوں گا۔ شوکاز کے بعد فیصل واؤڈا کا ٹوئٹر پیغام میں کہنا تھا کہ میرے مخالف جو چاہتے ہیں، کرلیں۔
میرے مخالف جو کرنا چاہیں کر لیں میں نے ارشد شریف کیلئے جو کہا ہے اس پر کھڑا ہوں، میں نے اپنی پارٹی کو ایک سچا مشورہ دیا ہے، پہلے بھی کہا چکا ہوں اور آج بھی کہ رہا ہوں کہ کچھ سازشی ہمارے پر امن مارچ میں معصوم لوگوں کو بلی کا بکرا بنا سکتے ہیں،اس میں پارٹی پالیسی کے خلاف کیا ہے؟
— Faisal Vawda (@FaisalVawdaPTI) October 26, 2022
ٹوئٹر پیغام میں فیصل واؤڈا نے مزید کہا کہ میں نے ارشد شریف کیلئے جو بیان دیا، اس پر قائم ہوں، پارٹی کو سچا مشورہ دیا۔ پہلے بھی کہہ چکا، آج بھی کہہ رہا ہوں۔ کچھ سازشی ہمارے پر امن مارچ میں معصوم لوگوں کو بلی کا بکرا بنا سکتے ہیں، اس میں پارٹی پالیسی کے خلاف کیا ہے؟
