دبئی میں گلف فوڈ ایکسپو ذائقوں اور مواقع کا سنگم

دبئی میں 17 سے 21 فروری 2025 تک جاری رہنے والی گلف فوڈ نمائش ایک شاندار اور رنگا رنگ ایونٹ ثابت ہوا، جہاں خوراک و مشروبات کے شوقین افراد سے لے کر صنعتی ماہرین، کاروباری شخصیات، سرکاری حکام اور پاکستانی سفارت کاروں تک، مختلف شعبوں سے تعلق رکھنے والوں نے شرکت کر کے اس موقع سے بھرپور استفادہ کیا۔

افتتاحی روز پاکستان کے سفیر برائے متحدہ عرب امارات فیصل نیاز ترمذی نے گلف فوڈ نمائش 2025 کا باضابطہ افتتاح کیا۔

اس موقع پر اقبال احمد اینڈ کمپنی کے ڈائریکٹر مارکیٹنگ، وحید احمد نے سفیر کا استقبال کیا۔ ربن کاٹنے کی تقریب کے بعد کمپنی نے اپنی مصنوعات کو عالمی خوراک و مشروبات کے شائقین کے سامنے پیش کیا اور نئے تجارتی مواقع کی تلاش میں تبادلہ خیال کیا۔

یہ نمائش عالمی سطح پر فوڈ انڈسٹری کے لیے ایک نمایاں پلیٹ فارم ہے، جہاں مختلف ممالک سے آنے والی کمپنیوں کو نہ صرف اپنی مصنوعات متعارف کرانے کا موقع ملتا ہے بلکہ کاروباری تعلقات کو فروغ دینے اور جدید رجحانات سے آگاہی حاصل کرنے کا بھی موقع فراہم ہوتا ہے۔