گوگل نیوز پر ہمیں فالو کریںکینیڈا کے ایک صوبے میں کم تعلیم یافتہ افراد کیلئے نوکریاں نکل آئی ہیں۔ البرٹا میں تعمیراتی شعبے میں ہنر مند مزدوروں کی کمی پیدا ہونے کے باعث 42 ہزار سے زائد مزدوروں کی کھپت کی گنجائش نکل آئی۔
نجی ٹی وی (آج نیوز) کی رپورٹ کے مطابق گزشتہ برس البرٹا کی آبادی میں 2 لاکھ نئے رہائشیوں کا اضافہ ہوا جس کے بعد وہاں سڑکوں، پلوں اور رہائش سمیت انفراسٹرکچر میں اضافے کے لیے تعمیراتی صنعت کو آگے آنا ہوگا۔
اس حوالے سے مقامی ویب سائٹ ’دی بلڈ فورسز‘ کا کہنا ہے کہ البرٹا کی تعمیراتی صنعت کو تقریباً 42 ہزار 500 کارکنوں یا ہنر مندوں کی ضرورت ہے جبکہ اس وقت کام کرنے والے مزدوروں کا 23 فیصد حصہ جلد ریٹائر ہونے والا ہے۔
حکام کا کہنا ہے کہ کینیڈا بھر میں صنعتی شعبے میں ہنرمندوں کی ضرورت ہے لیکن البرٹا میں اس کی کمی زیادہ ہے کیونکہ یہ صوبہ بنیادی انفراسٹرکچر کی ترقی کے بڑھتے ہوئے مطالبات کو پورا کرنے کی دوڑ میں شامل ہے۔
کینیڈین حکومت نے البرٹا از کالنگ مہم کا آغاز کردیا ہے جس کا مقصد مختلف کینیڈین شہریوں کے ہنر مندوں کو راغب کرنا ہے۔ مہم کے تحت البرٹا جانے اور 1 سال تک رہنے کی شرط پر 5000ڈالر قابلِ واپسی ٹیکس کی پیشکش بھی کی گئی ہے۔
