پاکستان کی ایما عالم نے 100 سے زائد حریفوں کو ہراکراسپیڈ ریڈنگ کا مقابلہ جیت لیا

کراچی:پاکستان کی ایما عالم نے 13ویں ورلڈ اسپیڈ ریڈنگ چیمپئن شپ کے فائنل میں دنیا بھر کے 100 سے زائد حریفوں کو شکست دے کر فائنل جیت لیا۔

کورونا وائرس کی وجہ سے تاخیر کا شکار ہونیوالی چیمپئن شپ اس ہفتے ٹیم پاکستان کی شاندار فتح کے ساتھ اختتام پذیر ہوئی۔

فائنل میں اپنے چینی حریف کو شکست دینے والی ایما عالم کو 2020 میں ورلڈ میموری چیمپئن اور گنیز ورلڈ ریکارڈ کے دو ٹائٹل کے حامل کے طور پر بھی تاج پہنایا گیا ۔

ورلڈ اسپیڈ ریڈنگ چیمپئن شپ میں چوتھی پوزیشن پر آنے والی عبیرہ اطہر ہیں۔ ٹیم پاکستان نے 12ویں ورلڈ مائنڈ میپنگ چیمپئن شپ میں بھی حصہ لیا جس میں ایما عالم نے تیسری اور عنبرین حمید نے چوتھی پوزیشن حاصل کی۔

مزید پڑھیں:پاکستان کی مسیحی ایتھلیٹ ایما عالم نے سیکڑوں حریفوں کو ہراکر ورلڈ میموری چیمپئن شپ جیت لی

اسپیڈ ریڈنگ چیمپئن شپ کے دوران حریفوں کو ایک کتاب اور اسے پڑھنے کے لیے زیادہ سے زیادہ دو گھنٹے فراہم کیے جاتے ہیں۔ جیسے ہی مدمقابل پڑھنا ختم کر لیتا ہے، ان کا وقت ریکارڈ کیا جاتا ہے۔

کتاب چھین لی جاتی ہے اور انہیں 20 سوالات کے ساتھ سوالیہ پرچہ دیا جاتا ہے جسے مصنف اور گلڈ آف مائنڈ اسپورٹس آربیٹرس کے ایک ثالث نے چند مخصوص اصولوں کے ساتھ ڈیزائن کیا تھا۔

سوالات کے جواب کے لیے ایک یا دو جملوں کی ضرورت ہوتی ہے، جس میں زیادہ انتخاب نہیں ہوتے۔ 2021 چیمپئن شپ میں فراہم کردہ کتاب کل 15823 الفاظ پر مشتمل تھی جسے ایما عالم نے 20 منٹ اور 4 سیکنڈ میں 789 الفاظ فی منٹ میں پڑھا۔

ایما اور ان کی ٹیم گزشتہ چار سالوں سے دماغ کے مختلف کھیلوں میں حصہ لے رہی ہے۔مقابلہ جیتنے کے بعد ایماعالم کاکہنا تھا کہ میں ایک اور عالمی ٹائٹل گھر لا کر بہت خوشی محسوس کر رہی ہوں۔