اقتصادی رابطہ کمیٹی میں5شعبوں کیلئے آر ایل این جی کی قیمت بڑھانے کی منظوری

اسلام آباد: وفاقی کابینہ کی اقتصادی رابطہ کمیٹی نے 5 شعبوں کیلئے آر ایل این جی کی قیمت میں اضافے کی منظوری دے دی ہے۔

تفصیلات کے مطابق وزیرِ خزانہ مفتاح اسماعیل کی زیرِ صدارت اقتصادی رابطہ کمیٹی کے اجلاس میں ملک بھر میں 5 برآمدی شعبہ جات کے موجودہ گیس صارفین کیلئے آر ایل این جی کی قیمت 9 ڈالر فی ایم ایم بی ٹی یو مقرر کرنے کی منظوری دی گئی۔

یہ بھی پڑھیں:

اقتصادی رابطہ کمیٹی ، گیس کی قیمت فروخت میں نظر ثانی کی منظوری 

اقتصادی رابطہ کمیٹی اجلاس کے دوران وفاقی کابینہ کو برآمدی شعبہ جات کیلئے مقامی گیس کے نرخوں میں 1ہزار350روپے اور عام صنعتوں کیلئے 1550روپے فی ایم ایم بی ٹی یو اضافے کی سفارش کی بھی کی گئی۔

اس دوران اقتصادی رابطہ کمیٹی نے آئندہ ماہ کی پہلی تاریخ سے 5 برآمدی شعبہ جات کیلئے بجلی کے نرخ 9 امریکی سینٹ فی کلو واٹ کرنے کی منظوری دے دی۔ یومِ آزادی کی تقریبات کیلئے وزارتِ اطلاعات کو 75کروڑ کی ضمنی گرانٹ دینے کی منظوری بھی دی گئی۔ 

خیال رہے کہ اس سے قبل وفاقی وزیر خزانہ مفتاح اسماعیل کی زیر صدارت اقتصادی رابطہ کمیٹی (ای سی سی)  کے اجلاس میں کمیٹی نے گیس کی قیمت فروخت میں مجوزہ نظرثانی کی منظوری دے دی۔

رواں ماہ کے آغاز میں ای سی سی اجلاس میں پیٹرولیم ڈویژن کی جانب سے مالی سال 2022-23 کے لیے قدرتی گیس کی قیمتوں کے حوالے سے سمری پیش کی گئی، اجلاس کو بتایا گیا کہ مالی سال 2015-2016 سے گیس کی قیمتوں میں اضافہ نہیں کیا گیا۔