گوگل نیوز پر ہمیں فالو کریںوفاقی دارالحکومت اسلام آباد اور راولپنڈی کے ساتھ ساتھ پاکستان کے مختلف شہروں میں آج زلزلے کے جھٹکے محسوس کیے گئے جن کی شدت ریکٹر اسکیل پر 4 اعشاریہ 2 رہی۔
تفصیلات کے مطابق زلزلہ پیما مرکز کا کہنا ہے کہ راولپنڈی اسلام آباد سمیت ملک کے دیگر شہروں پشاور، سوات، مینگورہ، بونیر، مالاکنڈ اور گردونواح کے علاقوں میں زلزلے کے جھٹکے محسوس کیے گئے۔
راولپنڈی اسلام آباد اور خیبر پختونخوا کے علاوہ زلزلے کے جھٹکے میرپور، بھمبر، کوٹلی اور آزاد کشمیر میں بھی محسوس کیے گئے، تاہم زلزلے سے ہونے والے کسی جانی نقصان کی اطلاع نہیں ملی۔
جھٹکے محسوس ہونے پر شہریوں میں خوف و ہراس پھیل گیا۔ لوگ کلمۂ طیبہ کا ورد کرتے ہوئے گھروں سے باہر نکل آئے۔ زلزلے کے جھٹکے آج صبح 10 بج کر 20 منٹ پر محسوس کیے گئے۔
زلزلہ پیما مرکز کے مطابق ریکٹر اسکیل پر زلزلے کی شدت 4 اعشاریہ 2 ریکارڈ کی گئی جس کا مرکز خیبر پختونخوا کے علاقے اپر دیر پہاڑی سلسلے میں مشرق کی طرف 25 کلو میٹر زیرِ زمین تھا جس کی گہرائی 30 کلو میٹر ریکارڈ کی گئی۔
یاد رہے کہ اِس سے قبل وطنِ عزیز پاکستان کےوفاقی دارالحکومت اسلام آباد ، راولپنڈی اور صوبہ خیبر پختونخواہ کے مختلف شہروں میں 6 ماہ قبل زلزلے کے جھٹکے محسوس کیے گئے۔
قبل ازیں 16 جون کے روز راولپنڈی، اسلام آباد اور گردو نواح میں 5 اعشاریہ 7 شدت کے زلزلے کے شدید نوعیت کے جھٹکے محسوس کیے گئے۔
مزید پڑھیں: راولپنڈی، اسلام آباد اور خیبر پختونخواہ میں زلزلے کے جھٹکے
