سعودی عرب میں گردو و غبار کا طوفان، سرخ آندھی، تیز ہوائیں چلنے لگیں

جدہ: سعودی عرب میں گردو غبار کے طوفان کے باعث ملک کے شمال مشرقی علاقوں میں دن کے اوقات میں رات کا سماں ہوگیا۔

بین الاقوامی میڈیا رپورٹ کے مطابق الجوف اور آس پاس کے علاقوں میں دن کے وقت رات کا سماں ہوگیا تھا، تیز ہواؤں اور گردو غبار کے طوفان کے باعث سعودی عرب کے مشرقی اور وسطی علاقے بھی لپیٹ میں آگئے۔

موسمیات کے ماہر عبدالعزیز الحصینی نے اس حوالے سے بات کرتے ہوئے کہا ہے کہ طوفان کا رخ الجوف اور شمالی علاقے سے تبوک اور حائل کے مشرقی و جنوبی علاقوں، مدینہ منورہ اور مکہ مکرمہ کے مشرقی علاقوں، قصیم اور ریاض کو یکے بعد دیگرے اپنی لپیٹ میں لیتا چلا گیا۔

ماہرین نے عوام کو ہدایت کی ہے کہ وہ آبادی سے باہر جائیں اور نہ کچے راستوں سے سفر کریں۔ شاہراہوں پر انتہائی ضرورت کی صورت میں ہی نکلیں اور طوفان رک جانے تک انتظار کریں۔کیونکہ اس کی شدت بہت زیادہ ہے، جس کے سبب نقصان کا اندیشہ ہے۔

عاصفة غبارية كثيفة تحجب الرؤية على منطقة #الحدود_الشمالية #عرعر #طريف #العويقيلة pic.twitter.com/qjdU1FdmEL

— إمارة منطقة الحدود الشمالية (@NorthborderSA) March 12, 2021

ماہرین موسمیات کا کہنا ہے کہ سنیچر کو سعودی عرب کے شمالی، وسطی اور مشرقی علاقوں میں دن کے وقت موسم معمول پر آجائے گا، جبکہ سنیچر اور اتوار کی درمیانی شب سردی بڑھ سکتی ہے۔

شمالی حدود، الجوف، ریاض، الشرقیہ، قصیم، حائل نیز مکہ مکرمہ اور مدینہ منورہ ریجنوں کے شمالی علاقوں میں ہواؤں کی رفتار 55 کلو میٹر فی گھنٹے سے زیادہ ہے۔جو عام دنوں میں چلنے والی ہواؤں کی رفتار سے بہت زیادہ ہے۔

سعودی عرب میں آنے والے گردوغبار کا طوفان سرخ آندھی کی شکل اختیار کیے ہوئے ہے۔ اس حوالے سے سوشل میڈیا پر تصاویر وائرل ہوگئی ہیں۔ یہ صورتحال سانس کے مریضوں کے لیے خطرناک ہے۔ انہیں احتیاط کی زیادہ ضرورت ہے۔