عائشہ منزل پر تیز رفتار ڈمپر نے موٹرسائیکل سواروں کو کچل دیا

کراچی: کراچی کے علاقے عائشہ منزل پر تیز رفتار ڈمپر نے موٹرسائیکل سواروں کو کچل دیا۔

تفصیلات کے مطابق کراچی کے علاقے عائشہ منزل فلائی اوور پر تیز رفتار ڈمپر کی زد میں آکر دو موٹر سائیکل سوار جاں بحق ہوگئے۔

پولیس کا کہنا ہے کہ موٹر سائیکل سوار تیز رفتار ڈمپر کی زد میں آکر جاں بحق ہوگئے، جاں بحق افراد کی لاشوں کو ضابطے کی کارروائی کے لیے اسپتال منتقل کردیا گیا۔

پولیس کے مطابق موقع پر موجود مشتعل افراد نے ڈمپر کو آگ لگادی جس کے بعد فائر بریگیڈ نے آکر ڈمپر میں لگی آگ کو بجھایا۔

یہ بھی پڑھیں:

سی ٹی ڈی کی کارروائی، کراچی سے چار دہشت گرد گرفتار

پولیس حکام کا کہنا ہے کہ مذکورہ ڈمپر کو تحویل میں لے لیا گیا ہے جبکہ ڈرائیور اور کلینر فرار ہونے میں کامیاب ہوگئے، جن کی گرفتاری کے لیے چھاپے مارے جارہے ہیں۔

تاہم ریسکیو حکام کا کہنا ہے کہ حادثے میں جاں بحق افراد کی شناخت جمال الدین اور اسرار احمد کے نام سے ہوئی ہے، دونوں گڈاپ ٹاؤن کے رہائشی تھے اور اُن کا تعلق خیبرپختونخواہ سے تھا۔

واضح رہے کہ گزشتہ دنوں کراچی کے علاقے ناگن چورنگی پر بھی ڈمپر کی زد میں آکر دو نوجوان جاں بحق ہوگئے تھے جس کے بعد مشتعل افراد نے ڈمپر کو آگ لگادی تھی۔