انٹر بینک میں ڈالر مزید مہنگا ہوگیا

کراچی: انٹر بینک مارکیٹ میں ڈالر مزید مہنگا ہوگیا۔

آج کاروباری دن کے دوران امریکی ڈالر 1.76 روپے اضافے سے 205.61 روپے کا ہوگیا جبکہ اوپن مارکیٹ میں بھی ڈالر کی قدر میں اضافہ ہوگیا ہے۔

خیال رہے کہ گزشتہ روز  ڈالر کے انٹربینک ریٹ ملکی تاریخ میں پہلی بار 203 روپے سے تجاوز کرگئے تھے جبکہ اوپن ریٹ 205 روپے کی سطح پر آگیا تھا۔

یہ بھی پڑھیں:

ملک بھر میں بجلی کی طویل لوڈ شیڈنگ جاری، عوام سراپا احتجاج

واضح رہے کہ موجودہ حکومت ملکی ضروریات کو پورا کرنے کے لیے ایندھن درآمد کرنے کے لیٹر آف کریڈٹ کھول رہی ہے جو زرمبادلہ کے ذخائر میں تسلسل سے کمی کا باعث بن رہی ہے جس سے اسٹیٹ بینک زرمبادلہ کے ذخائر سنگل ڈیجٹ پر آگئے ہیں۔

اسی طرح ماہوار بنیادوں پر ترسیلات زر کی آمد میں 25 فیصد کی کمی سے مارکیٹوں میں طلب کی نسبت رسد میں کمی نے روپیہ کو بے قدر کر دیا ہے۔

ماہرین کے مطابق  عالمی مارکیٹ میں خام تیل کی قیمتیں مطلوبہ حد تک نیچے نہ آنے، ملک پر بیرونی ادائیگیوں کے دباؤ اور آئی ایم ایف قرض پروگرام کی بحالی اور قسط کے اجراء میں تاخیر سے یومیہ بنیادوں پر مالیاتی بحران کی شدت بڑھ رہی ہے جو زرمبادلہ کی مارکیٹوں پر اثر انداز ہیں۔