پاکستان کے اسلامی بینک اسلام کے نام پر عوام کو کیسے لوٹ رہے ہیں، ہوشربا رپورٹ

سینیٹ کی قائمہ کمیٹی برائے خزانہ کے چئیرمین سلیم مانڈوی والا کا کہنا ہے کہ اسلامی بینکاری میں قرض لینے پر 25 سے 30 فیصد شرح سود لیا جاتا ہے، کنونشنل بینکاری 20 فیصد شرح سود چارج کرتی ہے، عوام کے ساتھ اسلامی بینکاری کے نام پر فراڈ ہورہا ہے۔

بدھ کو سینیٹ کی قائمہ کمیٹی برائے خزانہ کا اجلاس سینیٹر سلیم مانڈوی والا کی زیر صدارت ہوا، جس میں ڈیپازٹ پروٹیکشن کارپوریشن ترمیمی بل 2024 پر بریفنگ دی گئی۔

دوران اجلاس ڈپٹی گورنر اسٹیٹ بینک ڈاکٹر عنایت حسین نے کہا کہ بل میں صارفین کے تحفظ کو یقینی بنایا گیا ہے، بل منظوری کے بعد بھی مائیکرو فنانس بینکوں کو شامل نہیں کریں گے، کسی بینک کو شامل کرنے کا اختیار بورڈ کے پاس ہوگا۔

چیئرمین کمیٹی سلیم مانڈوی والا نے کہا کہ لوگ اسلام سے محبت کی وجہ سے نہیں بلکہ مالی مفاد کیلئے جاتے ہیں، میرے پاس کئی کیسز آئے ہیں جن میں اسلامی بینکاری میں شرح سود زیادہ ہونے کی شکایت آئی ہے۔

قائمہ کمیٹی خزانہ نے اسٹیٹ بینک سے اسلامی بینکاری پر بریفنگ طلب کرلی اور کہا کہ بین الاقوامی اسلامی بینکاری کے حوالے سے مروجہ طریقہ کار کے حوالے سے بھی بتایا جائے۔ ڈپٹی گوربنر نے کہا کہ بینکنگ کے شعبے میں روایتی بینکوں کو حصہ 75 اور اسلامی بینکاری کا 25 فیصد ہے۔

اجلاس میں ڈیپازٹ پروٹیکشن کارپوریشن ترمیمی بل 2024 کا تفصیلی جائزہ مکمل کیا گیا اور بل منظور کرلیا گیا۔