گوگل نیوز پر ہمیں فالو کریںچندی گڑھ میں مشہور پنجابی گلوکار دلجیت دوسانجھ کے کنسرٹ کے دوران شور کی سطح حد سے تجاوز کر گئی جس پر انتظامیہ نے بدھ کے روز پنجاب اور ہریانہ ہائی کورٹ کو آگاہ کیا۔
انڈین ایکسپریس کے مطابق عدالت سے “سخت کارروائی” کی سفارش کی گئی ہے کیونکہ عدالت نے 13 دسمبر کو تقریب کی اجازت دیتے ہوئے شور کی آلودگی کے قواعد پر عمل کرنے کی ہدایت دی تھی۔
چیف جسٹس شیل ناگو اور جسٹس انیل کشتری پال نے ایونٹ کے دوران شور کی مقررہ حد کو برقرار رکھنے پر زور دیا۔ چندی گڑھ کے ایک شہری کی جانب سے دائر کی گئی عوامی مفاد کی درخواست میں سیکٹر 34 کے نمائش گراؤنڈ میں عوامی تقریبات کے انتظامات، خصوصاً شور اور ہجوم کنٹرول کے لیے رہنما اصول وضع کرنے کا مطالبہ کیا گیا تھا۔
عدالتی حکم پر ڈپٹی کمشنر نے ایک کمیٹی تشکیل دی جس نے کنسرٹ کے دوران شور کی سطح کی نگرانی کی۔ انتظامیہ کی رپورٹ کے مطابق، شور کی سطح شور آلودگی قوانین 2000 میں مقرر کردہ حدود سے تجاوز کر گئی۔
اس کے نتیجے میں 16 دسمبر 2024 کو لکھے گئے ایک خط میں ماحولیاتی تحفظ ایکٹ 1986 کے تحت کارروائی کی سفارش کی گئی۔ ہائی کورٹ نے پہلے ہی واضح کر دیا تھا کہ وہ تقریب کی اجازت اسی صورت میں دے گی جب شور کی سطح مقام کی حدود پر 75 ڈیسیبل کے اندر رہے گی، بصورت دیگر سزا دی جائے گی۔
