شہر قائد کے مختلف علاقے گیس کی فراہمی سے محروم، صورتحال سنگین ہوگئی

کراچی:شہر کے مختلف علاقے گیس کی فراہمی سے محروم ، صورتحال سنگین ہوگئی ۔ مشتعل شہری سڑکوں پر نکل آئے ۔ملیر سعود آبادکے علاقے معین آباد (کالابورڈ) کے مکینوں گیس کی بندش کیخلاف میں روڈ پر شدید احتجاج ۔

مشتعل افرادنے ٹائرنذرآتش کرکے احتجاج شروع کردیا ۔ مرکزی سڑک بند ٹریفک معطل ، احتجاج میں خواتین بھی شریک ، شہریوں کا کہنا ہے کہ 15 روز سے گیس بند ہے ۔

متعدد شکایات کے باوجود ایس ایس جی سی گیس فراہم نہیں کر رہی۔ ہمارے پاس اب احتجاج کے سواء کوئی راستہ نہیں ۔ مشتعل افراد نے وزیر اعظم پاکستان عمران خان سے اپیل کی ہے کہ وہ فوری ایکشن لیں ۔

انہوں نے کہا کہ ہماری مشکلات میں پی ٹی آئی کا کوئی نمائندہ نہیں آیا ۔ وزیر اعظم اس کا بھی نوٹس لیں ۔ واضح رہے کہ گزشتہ 2 ماہ سے کراچی کے مختلف علاقوں میں گیس کا بد ترین بحران جاری ہے ۔

اکثر گیس پریشر میں شدید کمی کے باعث جلتے ہوئے چولہے بھی ٹھنڈے ہو جاتے ہیں ۔ جبکہ بعض علاقوں جن میں اولڈ سٹی ایریا، لیاری، لانڈھی ، ملیر ، شاہ فیصل کالونی، نیو کراچی، سرجانی کے بعض ایریاز میں کئی روز سے گیس کی فراہمی معطل ہے ۔

صورتحال کے حوالے سے ایس ایس جی سی کے ترجمان سے رابطہ کیا گیا تاہم انہوں نے فون نہیں اٹھایا ۔ان سے رابطے کی مسلسل کوشش کی جا رہی ہے۔