پاکستان اسٹاک ایکسچینج میں مندی، سرمایہ کاروں کو 90ارب سے زائد کا نقصان

کراچی: پاکستان سٹاک ایکسچینج میں رواں ہفتے کے چوتھے کاروباری روز (جمعرات) کے دوران 625 پوائنٹس کی گراوٹ دیکھنے کو ملی، جس کے نتیجے میں سرمایہ کاروں کو نقصان کا سامنا کرنا پڑا۔

آج کاروباری ہفتے کے چوتھے روز (جمعرات) کے دوران پاکستان اسٹاک ایکس چینج میں مندی کا رجحان رہا، سرمایہ کاروں نے شیئرز کی خریداری سے زیادہ حصص فروخت کرکے منافع کمانے کو ترجیح دی۔

یہی وجہ ہے کہ اختتام پر مارکیٹ 625 پوائنٹس کی کمی کے بعد 100 انڈیکس 46 ہزار 142 پوائنٹس کی سطح پر بند ہوا۔ آج ہونے والی مندی کے باعث سرمایہ کاروں کے 90 ارب روپے سے زائد ڈوب گئے۔

اسٹاک تجزیہ کاروں کے مطابق بڑی کمپنیوں کے مالی نتائج خراب آنے کے باعث سرمایہ کاروں کے اعتماد کو دھچکا لگا، جس کے باعث مارکیٹ میں حصص کی فروخت کا رجحان دیکھنے میں آرہا ہے۔