اسرائیل کی40کمپنیوں پر خطرناک سائبر حملے، قیمتی اور حساس ڈیٹا چوری

مقبوضہ بیت المقدس:اسرائیل کی چالیس بڑی فرموں کے آن لائن ڈیٹا پرسائبر حملوں کی اطلاعات ہیں۔ اسرائیلی ذرائع ابلاغ کے مطابق صہیونی کمپنیوں کے کمپیوٹر نیٹ ورک پر حملوں میں فلسطین نواز ہیکرز ملوث ہیں۔

اسرائیلی لاجسٹک اینڈ مشن سروسز کمپنی اورین نے اس بات کی تصدیق کی کہ وہ سائبر حملے سے متاثر ہوئی ہے۔ اس کمپنی نے اسرائیل کی اسٹاک ایکسچینج کو اپنی رپورٹ پیش کی ہے۔

جس میں اس کا کہنا تھا کہ کمپنی کے کمپیوٹر نیٹ ورک کو ہیکروں کی طرف سے حملوں کا نشانہ بنایا گیا ہے۔کمپنی نے کہا کہ یہ چالیس کمپنیوں میں سے ایک ہے جس کے پروگرامنگ سسٹم کو نشانہ بنایا گیا۔

اس کے علاوہ امیٹل بھی سائبر اٹیک سے متاثر ہوئی ہے۔ حملوں کا نشانہ بننے والی کمپنیوں میں تین کمپنیاں اسرائیل میں کرونا ویکسین کی تیاری پر کام کررہی ہیں۔جس کے باعث اسے شدید خطرات لاحق ہوگئے ہیں۔

امیٹل کمپنی کسٹم کلیئرنس کے شعبے میں کمپنیوں کے لیے پروگراموں کی مارکیٹنگ کررہی ہے جس سے یہ شبہات پیدا ہوئے کہ حملے کا مقصد اسرائیل کو بھیجے گئے پیکجوں تک رسائی میں رکاوٹ پیدا کرنا ہے۔