ایک ساتھ ڈگری مکمل کرنے کا باپ بیٹی کا منفرد اعزاز

پشاور یونیورسٹی آف انجینئرنگ اینڈ ٹیکنالوجی کے کانوکیشن میں باپ اور بیٹی نے ایک ساتھ پی ایچ ڈی کی ڈگری مکمل کرنے کا منفرد اعزاز حاصل کرلیا۔

تفصیلات کے مطابق ڈاکٹر مسعود خان نے میکا ٹرانکس جبکہ ان کی بیٹی ڈاکٹر نادیہ مسعود نے الیکٹریکل انجینئرنگ میں پی ایچ ڈی کی ڈگری حاصل کی۔

ڈاکٹر مسعود نے اس موقع پر گفتگو کرتے ہوئے کہا کہ کچھ گھریلو ذمے داریوں کے باعث انہوں نے بروقت پی ایچ ڈی مکمل نہیں کی، لیکن اب یہ اعزاز کی بات ہے کہ میں نے اپنی بیٹی کے ساتھ پی ایچ ڈی کی ڈگری حاصل کرلی۔

یہ بھی پڑھیں:سیاسی صورتحال کے پیش نظر پاکستان کرکٹ بورڈ کا پلان بی تیار

انہوں نے عوام پر زور دیا کہ بیٹیوں اور بیٹوں میں فرق نہ کریں بلکہ دونوں کو یکساں سپورٹ کریں۔ ان کا کہنا تھا کہ پی ایچ ڈی ڈگری لینا اسان کام نہیں لیکن بیٹی نے محنت کی اور اس محنت کا صلہ انہیں مل گیا۔

مزید برآں اس موقع پران کی بیٹی ڈاکٹر نادیہ مسعود خان نے کہا کہ پی ایچ ڈی ڈگری لینا اسان نہیں لیکن والدین نے بہت سپورٹ کیا اور وہ اس قابل ہوگئی کہ والد کے ساتھ ڈگری وصول کی،جو ان کیلئے باعث فخر ہے۔ انہوں نے تمام والدین پر زور دیا کہ وہ اپنے بچوں کو آگے بڑھنے میں سپورٹ کریں۔