کرپٹو کرنسی لینڈنگ کمپنی ’سیلسیئس نیٹ ورک‘ کریش، صارفین خودکشی کرنے کا سوچنے لگے

نیویارک: کرپٹو کرنسی لینڈنگ کمپنی ’سیلسیئس نیٹ ورک‘ کے کریش کرجانے سے صارفین مایوس ہوکر خودکشی کرنے کا سونے لگے۔

غیر ملکی میڈیا کے مطابق سیلسیئس نیٹ ورک کے دیوالیہ ہو جانے سے آئر لینڈ کے ایک شخص کا پورا فارم خطرے میں پڑ گیا جبکہ ایک امریکی شخص کا کہنا ہے کہ اُس کا سرمایہ ڈوبنے کی وجہ سے اُس کے ذہن میں خودکشی کے خیالات آرہے ہیں۔ یہی نہیں بلکہ کمپنی کے کریش کرجانے سے ایک 84 سالہ خاتون اپنی زندگی بھر کی جمع پونجی سے ہاتھ دھو بیٹھی ہیں۔

واضح رہے کہ مذکورہ کمپنی اربوں ڈالر مالیت کے اثاثوں کی حامل تھی، تاہم کرپٹو کرنسیوں کی قیمت میں تیزی سے کمی آنے اور دیگر کئی عوامل کے باعث یہ دیوالیہ ہوگئی۔

یہ بھی پڑھیں:

پاکستان اسٹیل مل سے 10 ارب روپے کا مٹیریل چوری ہونے کا انکشاف

جو امریکی جج کمپنی کے دیوالیہ ہونے کا تمام معاملہ دیکھ رہے ہیں، انھیں مختلف ممالک سے لوگوں کے خطوط موصول ہورہے ہیں، جن میں اس کمپنی کے متاثرین اپنی تکالیف سے جج کو آگاہ کررہے ہیں۔

معلوم رہے کہ سیلسیئس کے چیف ایگزیکٹو آفیسر الیکس ماشنسکی نے اپنی کمپنی کو کرپٹو کرنسیاں ڈیپازٹ کرانے کے لیے محفوظ ترین پلیٹ فارم بتایا تھا اور کہا تھا کہ اُن کی کمپنی کرپٹو کرنسی ڈیپازٹ پر سب سے زیادہ شرح سود بھی دیتی ہے۔ کمپنی لوگوں کی طرف سے ڈیپازٹ کرائی گئی کرپٹو کرنسیوں کو آگے ادھار دیتی اور سرمایہ کاری میں لگا دیتی تھی۔

تاہم، جب سے ڈیجیٹل کرنسی کرپٹو کی قدر میں کمی آنی شروع ہوئی، اس کمپنی کی ویلیو بھی کم ہونے لگی اور بالآخر اس کا دیوالیہ نکل گیا۔ کمپنی کے ذمہ اپنے کسٹمرز کے 4 ارب 70 کروڑ ڈالر واجب الادا ہیں۔