کورونا کی روک تھام کیلئے لاک ڈاؤن کا خدشہ، وزرائے تعلیم کا اجلاس آج ہوگا

اسلام آباد: کورونا کے بڑھتے ہوئے کیسز کے پیشِ نظر لاک ڈاؤن نافذ کیے جانے کا خدشہ ہے، اسکولز، کالجز اور یونیورسٹیز سمیت دیگر تعلیمی ادارے جزوی یا مکمل بند کرنے پر مشاورت کیلئے بین الصوبائی وزرائے تعلیم کا اجلاس آج ہوگا۔

تفصیلات کے مطابق ملک بھر میں کورونا کی نئی قسم اومی کرون کے پھیلاؤ کے باعث اسمارٹ لاک ڈاؤن نافذ کیے جانے کا خدشہ ہے۔ وفاقی وزیرِ تعلیم شفقت محمود کی زیرِ صدارت بین الصوبائی وزرائے تعلیم کے اجلاس میں اہم فیصلے متوقع ہیں۔

یہ بھی پڑھیں:

تعلیمی اداروں میں منشیات کے سدِ باب کیلئے کوشاں ہیں۔ڈی جی رینجرز

اومی کرون کا خطرہ بڑھ گیا، حکومت کا تمام تعلیمی ادارے بند کرنے کا اعلان 

ملک بھر میں کورونا کی روک تھام کیلئے ایس او پیز کے نفاذ کے ساتھ تعلیم و تربیت کا سلسلہ جاری ہے تاہم بڑھتے ہوئے وائرس کیسز کے پیشِ نظر تعلیمی اداروں کی صورتحال کا جائزہ لیا جائے گا۔ تمام صوبوں کے وزرائے تعلیم اجلاس میں شریک ہونگے۔

وفاقی وزیرِ تعلیم شفقت محمود کی زیر صدارت بین الصوبائی وزرائے تعلیم اجلاس میں نصابی کتب کی ملک بھر میں بروقت دستیابی اور ترسیل پر بھی مشاورت ہوگی۔ واضح رہے کہ وفاقی حکومت ملک بھر میں یکساں نصابِ تعلیم رائج کرنے کیلئے کوشاں ہے۔

خیال رہے کہ اس سے قبل قطر میں اومی کرون کے پھیلاؤ کے پیش نظر2 جنوری سے ایک ہفتے کے لیے تمام تعلیمی ادارے بند کرتے ہوئے فاصلاتی تعلیم کا نظام اپنانے کا فیصلہ کیا گیا۔پاکستان سمیت دیگر ممالک میں بھی تعلیمی اداروں کی بندش زیرِ غور ہے۔

اتوار سے قطر کے سرکاری اور نجی اسکولوں میں تمام طلبہ کی حاضری معطل کردی گئی۔یہ اقدام مملکت میں اومی کرون کے کیسز میں اضافے کے بعد سامنے آیا۔وزارتِ تعلیم کا کہنا تھا کہ کورونا کی نئی قسم کی روک تھام کیلئے بندش کا فیصلہ کیا گیا۔