عدالت کا بڑافیصلہ، میر شکیل الرحمان پرائیویٹ پراپرٹی کیس میں باعزت بری

لاہور: عدالت نے جنگ گروپ کے ایڈیٹر انچیف میر شکیل الرحمان سمیت دیگر ملزمان کو پرائیویٹ پراپرٹی کیس میں باعزت بری کردیا ہے۔

تفصیلات کے مطابق احتساب عدالت لاہور میں قومی احتساب بیورو کی جانب سے میر شکیل الرحمان کی درخواستِ بریت کا جواب داخل کرانے کے بعد دلائل بھی مکمل کرلیے گئے تھے۔

یہ بھی پڑھیں:

سکیورٹی خدشات، بلاول کا زمینی سفر کم، فضائی سفر کو ترجیح دینے کا فیصلہ

میرشکیل الرحمان کے وکیل امجد پرویز نے گزشتہ ہفتے بریت کی درخواستوں پر دلائل مکمل کیے۔ ان کا کہنا تھا کہ شہادتیں اگر قانون کے اعتبار سے درست نہ ہوں تو میرے مؤکل کو بری کیا جائے۔

بعد ازاں احتساب عدالت لاہور نے ملزم کی بریت کی درخواست پر فیصلہ محفوظ کیا جو آج سنایا گیا۔ فیصلے کے تحت میر شکیل الرحمان تمام تر الزامات سے بری قرار دے دئیے گئے ہیں۔

مقدمے میں گرفتاری کے دوران ضبط کی گئی اشیاء بھی میر شکیل الرحمان کو واپس کردی جائیں گی۔ واضح رہے کہ میر شکیل الرحمان کو 12مارچ 2020 کو گرفتار کیا گیا تھا۔

پرائیویٹ پراپرٹی کیس کے متن کے مطابق 1986 میں میر شکیل الرحمان نے جوہر ٹاؤن لاہور میں 54 کنال کی نجی جائیداد خریدی جسے جواز بنا کر نیب نے ان کو 5مارچ 2020 کو طلب کیا تھا۔