اپوزیشن کا تحریکِ عدم اعتماد کی کامیابی پر ملک گیر جشن، مٹھائیاں تقسیم

اسلام آباد: اپوزیشن رہنماؤں نے وزیر اعظم عمران خان کے خلاف تحریکِ عدم اعتماد کی کامیابی کے بعد ملک گیر جشن منایا ہے، مٹھائیاں تقسیم کیں اور آتش بازی بھی کی۔

تفصیلات کے مطابق عمران خان کو وزیر اعظم کے عہدے سے جمہوری طریقے سے ہٹائے جانے کے بعد رات گئے سے اب تک اپوزیشن کا جشن جاری ہے۔ جے یو آئی رہنماؤں اور کارکنان نے ریلی نکال کر پی ٹی آئی کے خلاف نعرے بازی کی۔

یہ بھی پڑھیں:

سپریم کورٹ کے فیصلے پر اپوزیشن کا جشن،  یوم تشکر منانے کا اعلان

جمعیت علمائے اسلام (ف) کی ریلی لبرٹی گول چکر تک جاری رہی جس میں کارکنان نے وزیر اعظم عمران خان کے خلاف نعرے لگائے۔ ن لیگی رہنماؤں نے لاہور سمیت پنجاب کے دیگر شہروں میں جشن مناتے ہوئے مٹھائیاں تقسیم کیں۔

کراچی سمیت سندھ بھر میں پی پی پی کارکنان کو جشن مناتے دیکھا گیا۔ ملک کے دیگر شہروں میں بھی پیپلز پارٹی رہنماؤں نے عمران خان کے خلاف تحریکِ عدم اعتماد کی کامیابی پر خوشیاں منائیں۔ کارکنان نے بھنگڑے ڈالے اور رقص بھی کیا۔

اسمبلی کے باہر بھی متحدہ اپوزیشن کے کارکنان نے ڈھول بجائے اور رقص و سرود سے جمہوری عمل کی کامیابی پر خوشی کا اظہار کیا۔ اس دوران آتش بازی کا مظاہرہ بھی کیا گیا۔ اراکینِ قومی و صوبائی اسمبلی نے بھی جشن میں حصہ لیا۔ 

متحدہ اپوزیشن کے رہنماؤں کا کہنا ہے کہ پی ٹی آئی حکومت نے ملک کو مہنگائی اور بے روزگاری کے سوا کچھ نہیں دیا۔ عمران خان حکومت معاشی مسائل پر قابو پانے میں ناکام رہی۔ شہباز شریف کو ملک کا نیا وزیر اعظم بنائیں گے۔