دو کھلاڑیوں کا کورونا ٹیسٹ مثبت، آئی پی ایل میں کھلبلی، میچ منسوخ

نئی دہلی:انڈین پریمئر لیگ (آئی پی ایل) میں پیر کی رات ہونے والا رائل چیلنجرز بنگلور (آر سی بی) اور کلکتہ نائٹ رائیڈرز(کے کے آر) کے مابین ہونے والا میچ کورونا کے بڑھتے کیسز کے باعث منسوخ کردیا گیا۔

بھارتی میڈیا رپورٹس کے مطابق کلکتہ نائٹ رائیڈرز کے کچھ کھلاڑیوں کا کورونا ٹیسٹ مثبت آیا ہے جس کے باعث میچ ملتوی کرنے کا فیصلہ کیا گیا۔ادھر آسٹریلوی میڈیا کا کہنا ہے کہ کولکتہ نائٹ رائیڈر کا حصہ ورون چکرورتی اور سندیپ وارئر کورونا کیسز سے متاثر ہوئے ہیں۔

دونوں کھلاڑیوں کو فوری طورپر آئسولیٹ کردیا گیاہے۔دوسری جانب کرکٹ آسٹریلیا نے انڈین پریمیئر لیگ کھیلنے والے کھلاڑیوں کیلئے فوری طورپر چارٹرڈ فلائیٹ کے انتظام سے انکار کردیا۔

کرکٹ آسٹریلیا کے چیف نک ہوکلے کے مطابق کھلاڑیوں کی صحت اور ان کی بحفاظت واپسی کی فکر ہے، اس حوالے سے ہم بھارتی کرکٹ بورڈ، اپنے کرکٹرز اور ایسوسی ایشن کے ساتھ مسلسل رابطے میں ہیں۔

فوری طورپر ایسے انتظامات ممکن نہیں جس سے کھلاڑیوں کو خصوصی طیارے کے ذریعے واپس لایا جاسکے۔گزشتہ ہفتے ایڈم زمپا اور کین رچرڈسن پابندیوں کے اعلان سے پہلے اپنے انتظامات کرکے کمرشل فلائٹ کے ذریعے لوٹے ہیں۔

کرکٹ آسٹریلیا کے چیف نے کہا کہ یہ کھلاڑی اپنی مرضی سے آئی پی ایل کھیلنے گئے ہیں،یہ اس وقت قومی ڈیوٹی پر نہیں، بھارت کرکٹ بورڈ سے بات چیت ہوئی ہے،انہوں نے واضح کیا کہ میچز کے لیے بہترین بائیو سکیور ببل کے انتظامات ہیں۔