انگلینڈ کرکٹ ٹیم کے دورہ پاکستان کی تصدیق، سیریز ستمبر سے شروع ہونے کا امکان

لاہور: انگلینڈ کرکٹ ٹیم کے دورہ پاکستان کی تصدیق ہوگئی، ٹی ٹوئنٹی سیریز ستمبر سے شروع ہونے کا امکان ظاہر کیا جارہا ہے۔

تفصیلات کے مطابق پی سی بی اور ای سی بی کی جانب سے انگلینڈ کرکٹ ٹیم کے آئندہ دورہ پاکستان کی تفصیلات تیار کرنے کے لیے ایک خصوصی کمیٹی قائم کردی گئی ہے، دونوں بورڈز ایک ساتھ مل کر مختلف امور پر بات چیت کریں گے، جن میں ٹور شیڈول اور پوری سیریز میں سکیورٹی انتظامات شامل ہیں۔

ذرائع کا کہنا ہے کہ ٹی ٹوئنٹی سیریز کے ستمبر سے شروع ہونے کا امکان ہے۔ انگلینڈ 7 میچوں کی ٹی ٹوئنٹی انٹرنیشنل سیریز میں پاکستان کے خلاف آمنے سامنے آئے گا۔

یہ بھی پڑھیں:

پاکستان کے نورزماں ایشین جونیئر اسکواش چیمپیئن بن گئے

ابتدائی طور پر سیریز میں پانچ ٹی ٹوئنٹی انٹرنیشنل شیڈول تھے لیکن انگلش کرکٹ بورڈ کے سابق چیف ایگزیکٹیو ٹام ہیریسن نے گزشتہ سال دورہ پاکستان کی منسوخی کے لیے مزید دو ٹی ٹوئنٹی میچز شامل کرنے کا اعلان کیا۔

انگلینڈ کی ٹیم اس سال کے آخر میں 3 میچوں کی ٹیسٹ سیریز کھیلنے کے لیے آئی سی سی ٹی ٹوئنٹی و رلڈ کپ کے اختتام کے بعد دوبارہ پاکستان کا دورہ کرے گی۔

خیال رہے کہ پی سی بی کے چیئرمین رمیز راجہ نے گزشتہ ہفتے کہا تھا کہ بورڈ جلد ہی انگلینڈ کے دورے کی حتمی تاریخوں کا اعلان کرے گا، جس میں دیگر تفصیلات جیسے مقام، وقت اور ٹکٹوں کی قیمتوں کا تعین بھی کیا جائے گا۔ سیریز کے لیے میچز لاہور، کراچی، راولپنڈی اور ملتان میں کروانے پرغور کیا جا رہا ہے۔