گوگل نیوز پر ہمیں فالو کریںلاہور: پنجاب کی وزیر اعلیٰ مریم نواز نے میو اسپتال کے میڈیکل سپرنٹنڈنٹ (ایم ایس) کو عہدے سے برطرف کر دیا۔ یہ اقدام ان کے اچانک دورے کے دوران مریضوں کی شکایات پر کیا گیا۔
دورے کے دوران مریضوں اور ان کے تیمارداروں نے اسپتال میں سہولیات کی کمی اور دیگر مسائل پر شکایات کیں، جس پر وزیر اعلیٰ مریم نواز نے اسپتال انتظامیہ کو سخت سرزنش کی۔
انہوں نے ایم ایس کی کارکردگی پر سوال اٹھاتے ہوئے کہاکہ آپ کو معلوم ہی نہیں کہ مریضوں کے ساتھ کیا ہو رہا ہے۔ آپ کو کس نے یہاں تعینات کیا؟ شکر کریں کہ میں آپ کو گرفتار نہیں کروا رہی۔”
انہوں نے اسپتال کی ابتر صورتحال پر افسوس کا اظہار کرتے ہوئے کہا کہ “لوگ یہاں علاج کی امید لے کر آتے ہیں لیکن انتظامیہ کو یہ تک معلوم نہیں کہ وارڈز میں کیا ہو رہا ہے۔”
مریضوں نے وزیر اعلیٰ کو آگاہ کیا کہ اسپتال میں ضروری طبی سامان، جیسے سرنج اور کینولا، دستیاب نہیں ہیں۔ جب انہیں معلوم ہوا کہ دل کے وارڈ میں کیڑے پائے گئے ہیں تو انہوں نے مزید برہمی کا اظہار کیا۔
انہوں نے فوری طور پر تمام بقایا جات کی ادائیگی اور دواؤں کی 100 فیصد دستیابی کا حکم دیا۔ ساتھ ہی سیکریٹری صحت کو ہدایت کی کہ وہ ذمہ دار اہلکاروں کی نشاندہی کر کے ان کے خلاف سخت کارروائی کریں۔
مریم نواز نے دورے کے دوران سندھ سے آئے ایک جوڑے کی شکایت پر فوری کارروائی کا حکم دیا۔ انہوں نے گوجرانوالہ کی ایک خاتون کو تسلی دی اور ایک نوجوان مریض کے گردے کی پیوندکاری کے لیے ہنگامی اقدامات کی ہدایت کی۔
پنجاب کی وزیر اعلیٰ نے میو اسپتال کی مرمت اور تزئین و آرائش کے لیے ایک جامع منصوبہ بنانے کا بھی حکم دیا۔
