وزیر اعلیٰ کا بارش سے متاثرہ سڑکوں کی بحالی کیلئے فنڈز جاری کرنیکا فیصلہ

کراچی: وزیرِ اعلیٰ سندھ سیّد مراد علی شاہ نے شہرِ قائد میں بارش سے متاثرہ سڑکوں کی بحالی و مرمت کیلئے فنڈز جاری کرنے کا فیصلہ کیا ہے جنہیں شہر کے مختلف علاقوں میں استعمال کیا جائے گا۔

تفصیلات کے مطابق وزیر اعلیٰ سندھ سیّد مراد علی شاہ نے کراچی میں سیمینار سے خطاب کرتے ہوئے کہا کہ ملک کے سب سے بڑے شہر میں بارش سے متاثر ہونے والی سڑکوں کی بحالی کیلئے ہنگامی فنڈ جاری کیا جائے گا۔

یہ بھی پڑھیں:

ایم کیو ایم کا کراچی اور حیدر آباد کو آفت زدہ قرار دینے کا مطالبہ

سیمینار سے خطاب کے دوران وزیر اعلیٰ نے کہا کہ کراچی میں زیادہ تر لوگ دیگر شہروں سے آئے، میں بچپن میں گارڈن کے کھیت میں کھیلا کرتا تھا۔ آج کل وہاں پاؤں رکھنے کی بھی جگہ نہیں ہوگی۔ بلند و بالا عمارات تعمیر کر لی گئی ہیں۔

خطاب کے دوران وزیر اعلیٰ نے کہا کہ 2003 میں کراچی کی 22 شاہراہوں کو کمرشل کردیا گیا۔ کراچی کو خراب کرنے میں ہم سب شامل ہیں۔ شہر کا پھیلاؤ بہت تیزی سے ہوا۔ بہتری کیلئے منصوبہ بندی جاری ہے۔

انہوں نے کہا کہ کوئی غلط کام نہ کرنے دینا حکومت کا فرض ہوتا ہے۔ 80 کی دہائی میں کراچی میں پہلی بار غیر قانونی قبضے سامنے آئے تو حکومت کس کی تھی؟ ہم وہ کرنے میں ناکام رہے جس کی عوام نے خواہش کی تھی۔