انقرہ، پاکستانی سفارتخانے میں ترکی کی قومی خودمختاری اور چلڈرن ڈے کی تقریب

انقرہ: پاکستانی سفارت خانے میں ترکی کی قومی خودمختاری کا دن اور چلڈرن ڈے کی تقریب ہوئی جس میں ترک حکام نے شرکت کی ہے۔

تفصیلات کے مطابق پاکستانی سفارت خانے میں ترکی کا قومی خودمختاری کا دن اور چلڈرن ڈے منایا گیا۔ یہ وہ دن ہے جب ترکی کے قومی رہنما مصطفیٰ کمال اتاترک نے پہلی ترک پارلیمنٹ کا اجلاس منعقد کیا تھا۔

یہ بھی پڑھیں:

اسرائیلی پولیس کامسجد اقصیٰ پرحملہ،57 فلسطینی زخمی

ترکی کے قائدِ ملت مصطفیٰ کمال اتاترک نے ترکوں کو جمہوریت کا تحفہ دیا۔ پاکستانی سفارت خانے میں منعقد کی گئی تقریب میں ترک حکام نے شرکت کی۔ پاکستانی سفیر سائرس سجاد قاضی تقریب کے مہمانِ خصوصی تھے۔

واضح رہے کہ ہر سال 23 اپریل کو ترکی میں قومی خودمختاری اور یومِ اطفال کے ساتھ ساتھ ترکی کی گرینڈ نیشنل اسمبلی کے افتتاح کی سالگرہ منائی جاتی ہے۔ آج بھی گرینڈ نیشنل اسمبلی کی 102ویں سالگرہ منائی گئی۔

اس حوالے سے انقرہ میں پہلی تقریب قومی اسمبلی کے اندر یادگارِ اتاترک کے سامنے منعقد ہوئی۔ تقریب میں ترکی کی گرینڈ نیشنل اسمبلی کے اسپیکر مصطفیٰ شنتوپ کی جانب سے یادگارِ اتاترک پر پھولوں کی چادر چڑھائی گئی۔

سفید اور سرخ پھولوں کی چادر چڑھانے کے بعد قومی اسمبلی میں ایک لمحے کی خاموشی اختیار کی گئی اور ترکی کا قومی ترانہ بھی پڑھا گیا۔ وزیر تعلیم محمود اوزیر نے قومی حاکمیت اور چلڈرن ڈے کے اعتبار سے مزارِ اتاترک پر حاضری دی۔