چیئرمین جوائنٹ چیفس آف اسٹاف کمیٹی کااین سی او سی کا دورہ

راوالپنڈی:آئی ایس پی آرکے مطابق چیئرمین جوائنٹ چیفس آف اسٹاف کمیٹی (سی جے سی ایس سی)، جنرل ندیم رضا نے آج این سی او سی کا دورہ کیا۔ سی جے سی ایس سی کا کمانڈر آرمی ایئر ڈیفنس کمانڈ اینڈ نیشنل کوآرڈینیٹر این سی او لیفٹیننٹ جنرل حمود از زمان خان نے استقبال کیا۔

چیف آف نیول اسٹاف، ایڈمرل ظفر محمود عباسی اور چیف آف ایئر اسٹاف، ایئر چیف مارشل مجاہد انور خان بھی دورے کے دوران چیئرمین جوائنٹ چیفس آف اسٹاف کمیٹی کے ہمراہ تھے۔

سی جے سی ایس سی کو کورونا وائرس کے خلاف قابو پانے کی کوششوں اور نفاذ کے اقدامات کی تازہ ترین صورتحال، پاکستان میں اس بیماری کے پھیلنے کے امکانات اور وبائی امراض کے خلاف سول انتظامیہ کی طرف سے دی جانے والی امداد کے بارے میں تفصیل سے بتایا گیا۔

چیئرمین جوائنٹ چیفس آف اسٹاف کمیٹی نے این سی او سی کی غیر معمولی کوششوں کی تعریف کی اور تمام اسٹیک ہولڈرز کو بروقت اور باخبر فیصلہ سازی کے لئے مختصر وقت میں فیصلہ کرنے کے لئے ڈیٹا سے چلنے والے ان پٹ کو سراہا۔