جرمنی میں پاکستانی سفارت خانے کے زیر اہتمام موسیقی سے مزین تقریب

برلن: جرمنی میں پاکستانی سفارت خانے کے زیرِ اہتمام موسیقی سے مزین آرٹس اور میوزک کی تقریب منعقد کی گئی ہے جس کا مقصد جرمنی کے شہریوں کو پاکستانی فنونِ لطیفہ سے متعارف کرانا تھا۔

تفصیلات کے مطابق جرمنی کے دارالحکومت برلن میں پاکستانی سفارت خانے کے زیرِ اہتمام جرمنی میں بسنے والے طلبہ، سفارت کاروں اور مقامی جرمن افراد کیلئے ایک آرٹ اور موسیقی کی تقریب منعقد کی گئی۔

یہ بھی پڑھیں:

میں بچپن سے آئینے کے سامنے اداکاری کرتی آئی ہوں۔امر خان

تقریب کا مقصد مہمانوں کو پاکستان میں موجود فنونِ لطیفہ کے روایتی اور فنی پہلوؤں سے روشناس کرانا تھا۔ سفیرِ پاکستان ڈاکٹر محمد فیصل نے مہمانوں کو خوش آمدید کہتے ہوئے تقریب سے خطاب کیا۔

شرکائے تقریب سے خطاب کرتے ہوئے ڈاکٹر محمد فیصل نے کہا کہ پاکستان کو قدرت نے بے شمار شاندار اور ہنر مند افراد سے نوازا ہے جنہوں نے دنیا بھر میں اپنی صلاحیتوں کا لوہا منوایا۔ اس قسم کی تقریبات منعقد کی جانی چاہئیں۔

تقریب سے خطاب کرتے ہوئے انہوں نے کہا کہ پاکستانی فنون اور صلاحیتوں کو دنیا بھر میں پذیرائی بخشنے کیلئے اس قسم کی تقریبات کا انعقاد ضروری ہے۔ تقریب کی مہمانِ خصوصی پروفیسر سلیمہ ہاشمی تھیں۔

 پروفیسر سلیمہ ہاشمی نے خصوصی طور پر پاکستانی خواتین فنکاروں کے مختلف ادوار میں کیے گئے کام کے ارتقاء اور فن کے بارے میں ماہرانہ تبصرہ کیا۔ استاد اشرف شریف خان اور ساتھیوں نے شرکاء کو خوبصورت موسیقی سے محظوظ کیا۔

استاد اشرف اورساتھی یورپ کے طول و عرض میں کامیابی کے ساتھ اپنے فن کا مظاہرہ کرچکے ہیں اور روایتی مشرقی موسیقی کو جدید طرز سے ہم آہنگ کرکے یورپ میں نام کما چکے ہیں۔ تقریب میں شریک مہمانوں نے فنکاروں کے فن کی خوب داد دی اور خوشی کا اظہار کیا۔