وفاقی کابینہ نے قومی سائبر سیکورٹی پالیسی، ڈیجیٹل میڈیا کیلئے اشتہارات کی منظوری دیدی

اسلام آباد:وفاقی وزیر اطلاعات و نشریات فواد چوہدری نے کہا کہ کابینہ نے ملک کی پہلی قومی سائبر سیکیورٹی پالیسی کی منظوری دے دی ہےجبکہ پاکستان کی تاریخ میں پہلی مرتبہ ڈیجیٹل میڈیا کو حکومت کے اشتہارات میسر ہوں گے،ملک میں تھریٹ کمیٹیاں بنائی جائیں گی۔

وفاقی کابینہ کے اجلاس کے بعد میڈیا سے گفتگو کرتے وفاقی وزیر اطلاعات و نشریات فواد چوہدری نے کہا کہ دنیا بہت تیزی سے سائبر وار کی طرف جارہی ہے، آج ہم اپنی ساری بینکنگ ٹرانزیکشنز اے ٹی ایمز اور موبائل فون پر کر رہے ہیں تو اگر ریکارڈ ہیک ہوجائے تو مسائل کھڑے ہوسکتے ہیں۔

انہوں نے کہا کہ اہم پالیسی بنائی ہے اور پاکستان کی تاریخ میں پہلی مرتبہ ڈیجیٹل میڈیا کو حکومت کے اشتہارات میسر ہوں گے، اس وقت ڈیجیٹل اشتہارات 25 ارب ہوگئی ہے۔

انہوں نے کہا کہ وزیراعظم عمران خان نے سیکورٹی کے حوالے سے ایک نیا نظام وضع کرنے کا حکم دیا ہے اور وفاقی کابینہ نے فیصلہ کیا ہے کہ تھریٹ کمیٹیاں بنائی جائیں گی۔

مزیدپڑھیں:شہزاد اکبر کی شکایت پرجہانگیر ترین گروپ کے رکن پنجاب اسمبلی نذیر چوہان گرفتار

وفاق، پنجاب، گلگت بلتستان، خیبرپختونخوا اور اب کشمیر میں جہاں پی ٹی آئی کی حکومت ہے وہاں کمیٹیاں بنائی جائیں گے جو انفرادی خطرات کا جائزہ لیں گی اور اس کے مطابق سیکورٹی کا بندوبست کیا جائے گا۔

وفاقی وزیر اطلاعات نے کہا کہ الیکٹرونک ووٹنگ کے حوالے سےاپوزیشن کے ساتھ معاملات خوش اسلوبی سے آگے بڑھ رہے ہیں، اسپیکر قومی اسمبلی آذربائیجان گئے ہوئے ہیں، جب واپس آئیں گے تو کمیٹیوں کے ذریعے بات ہوگی۔

ان کا کہنا تھا کہ کابینہ نے سرمایہ کاری بورڈ کو کاروباری افراد، کمپنیاں اور خصوصاً نیا کاروبار شروع کرنے والے افراد کی آسانی کے لیے فرسودہ قوانین کو ختم کرکے نئے قوانین کے اجرا کے عمل کا آغاز کرنے کا اختیار دیا ہے۔