فیصل واوڈا کی خالی نشست پر مفتاح اسماعیل ن لیگ کے امیدوار نامزد

کراچی: تحریک انصاف کے رہنما فیصل واوڈا کی جانب سے قومی اسمبلی کی رکنیت سے استعفیٰ دینے کے بعد ن لیگ نے این اے 249 کے ضمنی الیکشن کے لیے امیدوار نامزد کردیا۔

تفصیلات کے مطابق پی ٹی آئی رہنما فیصل واوڈا کے استعفے کے بعد ن لیگ کی قیادت نے سابق وزیر خزانہ مفتاح اسماعیل کو ٹکٹ دینے کا فیصلہ کیا ہے۔

ذرائع ن لیگ کا کہنا ہے کہ مفتاح اسماعیل پی ڈی ایم کے مشترکہ امیدوار ہوں گے۔

واضح رہے کہ این اے 249 پر 2018 میں شہباز شریف اور فیصل واوڈا مدمقابل تھے، سابق وفاقی وزیر فیصل واوڈا نے شہباز شریف کو شکست دی تھی۔

یہ بھی پڑھیں : وزیراعظم سے ارکان قومی اسمبلی جمیل احمد اور فہیم خان کی ملاقات

سینیٹر کا انتخاب لڑنے کے لیے فیصل واوڈا نے قومی اسمبلی کی رکنیت سے استعفیٰ دیا تھا، ان کے استعفیٰ دینے کے بعد این 249 کی نشست خالی ہوئی ہے۔

یاد رہے کہ سندھ سے پی ٹی آئی کے ایم این اے فیصل واوڈا اور پیپلز پارٹی کے سندھ اسمبلی کے رکن جام مہتاب کے سینیٹر منتخب ہونے سے ان کی قومی اور سندھ اسمبلی کی دو نشستوں پر ضمنی انتخابات اگلے دو ماہ میں ہوں گے جن کا اعلان الیکشن کمیشن کرے گا۔