کراچی میں بی آر ٹی اورنج لائن بس سروس کا افتتاح کردیا گیا

کراچی: شہر قائد میں بی آر ٹی اورنج لائن بس سروس کا افتتاح کردیا گیا ہے۔

تفصیلات کے مطابق وزیر ٹر انسپورٹ سندھ شرجیل انعام میمن نے کراچی کے شہریوں کے لیے اورنج لائن بی آر ٹی بس سروس کا افتتاح کر دیا۔

شرجیل انعام میمن نے میڈیا سے گفتگو میں کہا کہ آج اورنج لائن عوام کے لیے کھول دی گئی ہے، سیلابی صورتحال کی وجہ سے تقریب کو سادگی سے منعقد کیا گیا ہے۔

انہوں نے کہا کہ اورنج لائن بس سروس کا کرایہ 10 سے 20 روپے تک ہے اور 4 اسٹیشنز ہیں، پیٹرول مہنگا ہونے کے باوجود موجودہ حالات کو مدنظر رکھتے ہوئے کم کرایہ رکھا گیا ہے۔

یہ بھی پڑھیں:

منی لانڈرنگ کیس، عدالت کا سلیمان شہباز کے مزید 13 بینک اکاؤنٹس منجمد کرنے کا حکم

صوبائی وزیر کا کہنا تھا کہ اورنج لائن پراجیکٹ کی بسیں جدید ترین ہیں اور اس منصوبے کی 100 فیصد لاگت پیپلز پارٹی کی صوبائی حکومت نے اٹھائی ہے۔

شرجیل انعام میمن کا مزید کہنا تھا کہ کراچی کے شہریوں کو جلد ٹرانسپورٹ کی بہت بڑی خوشخبری ملے گی جس کے بارے میں انہیں آگاہ بھی کردیا جائے گا۔